US LA VAL
 
 
     
 

8ª partida de campionat rit. - San Iöre Jr.

Stampa PDF

scuadra_20161

Devënta miritada y fondamentala por La Val che defënn inant en secundo post nia ciamó daldüt sigü.







Le campionat de 3ª categoria va bel plan a piz, mo la scuadra da La Val mëss ciamó ciaré de mët al sigü les ultims ocajiuns da fa punc, chësc por se assiguré le secundo post de tlassifica, nia ciamó daldöt sigü, che uress dì partides de dezijiun por porvé y speré de fa le salt de categoria. La penultima de chëstes ocajiuns é gnüda anuzada a dovëi, sön le ciamp dl San Iöre à i ladins fat bun le laur portan a ciasa te sach bëgn cater goi adüm ai trëi punc.

Sot a n gran cialt à metü man la partida, atira al’atach é i ladins, che anuzëia le ciamp lerch por taié fora la defenjiun y preparé amez por i cumpagns. Le pröm gol sön na te ocajiun toma ala cherd’ora, le sogadú amez Christian fej bun le movimënt y preparëia le palé amez por Stefan che röia da iadô y à ma plö bria de tra dlungia le pé de porta it. Prigorusc se fej i pustri püch do, le atacant se fej lerch al limit y fej pié ia la trata sön le pé lunch, la reativité de Sepl indere fej desfanté la trata. Dal’atra pert pro Franz de rebat na crossada de cé cuntra porta, le palé röia indere de püch sura fora.


Le pröm tëmp se stlüj jö sön le 1 a 0 por La Val.


Do avëi palsé y recuperé forzes röia i ladins te ciamp plö determinà a mët al sigü le resultat. Atira dal mëteman toma le secundo gol, le atacant Samuel W. vëgn sorví dal mezciamp amesa l’area, al’anuzëia a dovëi le control dl palé y la trata cuntra porta por le gol dl 2 a 0. Al 50^ röia Christian a staché de cé decuntra ala crossada, le curan rebat indere sön la stangia de porta. I ghesc fej inant presciun y ne lascia nia sughé le palé ai aversars, insciö garetl ince le terzo gol al 55^, Franz ti sciampa al defensur y se presentëia sú dan le portier, al vëiga bun y preparëia la trata por le cumpagn Marco S. da na pert che à ma plö bria de apogé te rëi. Franz à ciamó sön le pé n’ocajiun d’or, le palé alt sura la defenjiun ti röia dan le pé, sú dan le verdaporta prô l’atacant le cazü sura fora, che ne gareta nia. Le San Iöre pro ciamó cun val trata nia prigorosa cuntra porta mo se stënta a concretisé les aziuns. A mët al sigü definitivamënter le resultat é Stefan che pënsa al 80^, sön na trata dal ciantun vëgn le curan rebatü al limit, daulach Stefan vega al jore y indirizëia la trata sön le pé lunch de porta. Sön chësc ultim gol perd i sogadus dl San Iöre les forzes de porvé a remunté le resultat, al ne passa tröp che l’arbiter sciüra la fin di nonanta menüc. Cun chësta devënta se porta La Val a 33 punc dan Le Dietenheim cun 30 punc, tl’ultima partida de campionat mëss La Val arjunj almanco un en punt por confermé le secundo post y podëi jì insciö ales partides de dezijiun. Tl cajo de na pordüda y na devënta da pert dl Dietenheim mëss i ladins ciamó n iade se mosoré cuntra i pustri.


San Iöre Iunior – La Val  0-4


Formaziun La Val: 1. Josef Kantioler (dal 80^ Julian Moling), 2. Luca Pescollderung (dal 70^ Alexander Miribung), 3. Werner Sottara, 4. Paolo Vallazza, 5. Marco Castlunger, 6. Christian Dapoz, 7. Marco Sottara, 8. Max Nagler (dal 75^ Felix Nagler), 9. Samuel Winkler (dal 70^ Campei Michele), 10. Stefan Sottara - capitan, 11. Franz Tolpeit (dal 80^ Martin Ploner)

Goi por La Val: Stefan Sottara al 15^ y al 80^, Samuel Winkler al 48^ y Marco Sottara al 55^


Proscima partida: In domënia ai 28 de mà dales 16:00 te ciasa l’ultima partida de campionat cuntra la scuadra da Gsies.


Atri resultac:


Altherren (La Val): Schabs – La Val: 2-1

Iuniors (Val Badia): Val Badia – Freienfeld: 3-0

Jogn A (La Val): Team 4– La Val: 8-2

Jogn B (La Val): La Val – Taufers: 2-2

U11 (La Val/San Martin):Teldra Jugend Gitschn – La Val/San Martin: 0-3

U10 (San Martin/La Val): Reischach blanch – San Martin/La Val: 2-0

U8 (La Val:

torné a San Martin: Burnech– La Val: 3-3 / Kiens – La Val: 0-2 / La Val – Burnech arance: 0-0

 

 

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©