US LA VAL
 
 
     
 

1ª partida de campionat - Tasten/Welsberg

Stampa PDF

scuadra_20161

Le Tasten mët a düra proa La Val, che crëi y segnëia al’ultim menüt por porté a ciasa en punt d’or.


Ince la scuadra da La Val, sot la direziun dl’alenadù da l’ann denant Gerhard Hilber, á scomencé süa nöia aventüra te 2 categoria. En nü campionat de livel plö alt cun nüs aversars ciamó da scurí ti aspeta ai ladins. La scuadra á bel podü ciarcé le livel te Copa Provinzia cuntra le Plaus (3-1, 0-0), daulache i aversars á albü la miú passan le rode. La Val fej bela parüda te süa prüma partida cuntra le Tasten, aversar sterch che mët a düra proa i ladins. Por ester bugn de avalié le resultat mëss chisc se trá ite les manies y crëi cina l’ultim mumënt.

Atira é i padruns de ciasa che mët sot a presciun i ghesc. Al 10^ menüt é Sepl che tëgn sö n palé rebatü de ce sön trata dal ciantun. Püch do, sön na medema crossada, pro le nü dl Tasten ciamó n iade de cé, le palé ti fej le pulan al pé de porta. Al 20^ la miú ocajiun por La Val: sön trata dal ciantun é le defensur P. Vallazza che controlëia le palé cun le pé y fej pié ia na trata a bót sigü sö tla stangia de porta. Le vantaje dl Tasten röia spo al 35^, sön na passaja filtranta dër tl dübe te forajüch vëgn Sepl fora de porta y contrastëia l’atacant, l’arbiter ne sighita nia y mostra sön le punt di önescmetri, trata trasformada spo dal aversar Appenbichler. Dan le pröm tëmp prô ciamó le atacant aversar na trata a giré che rabat cuntra le pé dla porta ladina.


Le pröm tëmp se stlüj jö sön le le 1-0 por le Tasten.


Ince sce l'orenté de avalié atira le resultat ne mancia nia, se stënta i ladins a costruí le jüch tl secundo tëmp. I sogadus dl Tasten se alza y se fej prigorusc sön plö aziuns. Al 65^ se fej lerch le nü cuntra porta mo püch dan la trata vëgn chësc antizipé cun n gran recuper da Marco Sottara. Püch do ti sciampa ciamó le medemo al defensur ladin, impede jí cuntra porta prol na trata plötosc debla dal limit cuntra le portier Sepl. Tl'ultima cherd'ora se fej udëi ladins che crëi ciamó tl gol, cun la formaziun che se alza y lascia trëi defensurs a defënn, mo purmó ala fin dl recuper vëgn le palé crossé amez por Franz che se presentëia sú dan l'un dl Tasten y cun na trata de prezijiun fejl balé la rëi de porta. Püch do sciüra l'arbiter la fin dla partida. Na bela sodesfaziun por n punt arjunt cun le laur de düta la scuadra, che à tigní bót ai aversars y à cherdü al gol cina le sciür dla fin!


Tasten/Welsberg – La Val : 1 - 1

Formaziun La Val: 1. Sepl Kantioler, 2. Marco Sottara, 3. Werner Sottara (dal 88^ Adrian Miribung) 4. Paolo Vallazza, 5. Marco Castlunger, 6. Max Nagler (dal 60^ Christian Terza), 7. Alexander Miribung (dal 60^ Michele Campei), 8. Franz Tolpeit, 9. Samuel Winkler (dal 80^ Felix Nagler), 10. Stefan Sottara - capitan, 11. Alex Elzenbaumer


Gol por La Val: Tolpeit Franz al 92^


Proscima partida: La Val süga en sabeda ai 09 de setëmber dales 16:00 a La Val cuntra le Reischach

Atri resultac:

Altherren (La Val): Falzes – La Val  1-0

U-9 (La Val): La Val – Alta Badia/San Martin  5-1

 

 

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©