US LA VAL
 
 
     
 

8ª partida de campionat - Val Badia

Stampa PDF

foto_scuadra

En derby ladin dals mile emoziuns chël sughé l’ultim fin dl’edma sön le ciamp „Pradel“ a San Martin.






La Val incunta indo do valgügn agn la formaziun dl’ACD Val Badia che se presentëia dal mëteman te ciamp plö determinà y cun la iüsta agresivité por fa garaté la devënta. Al bel publich rové adalerch i él gnü pité na partida plajora y interessanta cina le sciür dla fin.

Sciöche bel anuzé é la formaziun de ciasa che pëia ia cun sbunf y à ince les prömes ocajiuns da segné sön deplö trates dal ciantun. Fora dl mumënt por la Val Badia é l’arbiter che conzed la mascima puniziun por en fal de man evidënt amesa area. Alex E. se presentëia sigü ala trata y porta in vantaje la scuadra. Püc menüc de ligrëza por i ghesc, che subësc inant la presciun de ciasa y insciö tosc la parité. Al 30^ menüt röia Alex S. sú sön la passaja amez y pro la trata te porta, chiló é Sepl bun de paré mo le palé rebatü vëgn ciamó n iade trat cuntra porta dal medemo sogadú, che ti gareta ince por le 1 a 1. Nianca le tëmp da festejé che Matthias S. röia sú cuntra porta y vëgn contrasté dan la trata, l’arbiter ne sighita nia y mostra le punt di önescmetri. Le medemo atacant trasformëia cun segurté por le vantaje dla Val Badia. I sogadus da La Val, nia posizionà a dërt post, mëss se paré dal jüch asvelt di padruns de ciasa che röia scialdi por prüms sön le palé y la partësc fora cun velozité.


Le prüm tëmp se stlüj jö sön le resultat de 2 a 1 por la Val Badia.


Tla secunda pert vega l’alenadù Hilber na mudaziun drastica tla formaziun da La Val, che porta atira sü früc. I ghesc röia te ciamp ciarià de forza y se posizionëia a dovëi te ciamp. Al 60^ é la crossada amez perfeta por Michele che vëgn indere contrasté dal’un dla Val Badia, le mandl fosch conzed la terza trata dal önescmetri. Le bun refles dl portier Renè tëgn sö la trata de Alex E., chësc ultim é impó asvelt por rové sön le palé rebatü por apogé te porta. Püc menüc plö tert pëia ia na bela aziun dala pert ciampa cun Franz che ciafa le trú lëde da na pert jö y mët amez na passaja bassa por Michele, che röia cun sbunf da ia dô y canonëia cuntra porta por le vantaje. Al 68^ é la passaja dal mezciamp che taia fora la defenjiun y röia al medemo Michele, cun dezijiun y sú dan le portier prôl en mez palonët che ti gareta ince por süa doplëta personala. Tl’ultima cherd’ora se alza ciamó la Val Badia por ciaré de avalié le resultat, al 80^ pëia ia na gran trata al limit che rebat cuntra la stangia de porta y passa fora l’area. Impó combat inant La Val y cun le sciür dla fin se concretisëia la devënta. La Val à anuzé bun les ocajiuns da gol costruides y te n cört tëmp ti era garatada da rosedé de plëgn le resultat.


Val Badia  – La Val : 2-4


Formaziun La Val: 1. Sepl Kantioler, 2. Luca Pescollderung (dal 55^ Alexander Miribung), 3. Werner Sottara, 4. Paolo Vallazza, 5. Christian Dapoz, 6. Franz Tolpeit, 7. Michele Campei (dal 85^ Egon Frenes), 8. Max Nagler (dal 30^ Marco Sottara), 9. Samuel Winkler (dal 75^ Felix Nagler), 10. Stefan Sottara - capitan, 11. Alex Elzenbaumer


Goi por La Val: Alex Elzenbaumer (18^ y 60^), Michele Campei (62^ y 66^)


Proscima partida: In dumënia ai 29 de otober dales 14:30 te ciasa cuntra le Mareo.

Atri resultac:

  • Juniores: Mareo/La Val – Hochpustertal : 5 - 1
  • U-15: La Val – Untereisacktal: 0 - 10
  • U-12: La Val – Team 4 cöce: 1 – 1
  • Altherren (Copa Provinzia): Latzfons – La Val: 1-2

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©