US LA VAL
 
 
     
 

10ª partida de campionat - Gais

Stampa PDF

foto_scuadra

Na prestaziun debla cuntra le Gais, che concretisëia a dovëi les ocajiuns y mët bëgn trëi iadi la cogura te rëi ladina.






La Val dess anuzé bun chësta ocajiun por sorpassé le Gais de tlassamënt mo mëss fa i cunc cun en aversar plö determiné a davagné, che comana le jüch por gran pert dla partida. Les ocajiuns di padruns de ciasa, da arcumpedé sön na man sora, é gnüdes concretisades a dovëi y insciö ince la devënta miritada. Ai ladins ti mancia deperpo le carater y l’agresivité desmostrada tles ultimes partides.

Le pröm gol de chësta partida toma bel dl 5^, chilò ti da le vënt n gran aiüt al Gais che fej pié ia na lungia trata dal mezciamp cuntra porta: le palé rimbalzëia amesa area y vëgn suflé dal vënt sura Sepl ite por le 1 a 0. I ladins capësc tosc de messëi tignì le palé ia por tera a gauja dl vënt che sofla dassënn decuntra. Chiló é l’aversar plö sterch y antizipëia en grüm de palés, les ripartënzes é prigoroses mo vëgn por fortüna tignides sö denant co ruvé a contlujiun. Üna de chëstes é indere fatala, al 37^ se fej lerch l’aversar da na pert y preparëia por le cumpagn al limit, chësc prô na trata bassa al jôre sön le pé lunch de porta che ti gareta ince por le dopl vantaje. Le terzo gol che ti taia les giames ai ghesc röia al 50^: le sterch sogadú Lanz roda le palé al compagn dal’atra pert che ciafa le trú cuntra porta y passa amez por la trata te porta dl’atacant Hellweger. Ince sön chësc gol é i ladins massa pëigri a marché l’aversar che pó insciö condüj la cogura de vigni vers.


Le prüm tëmp se stlüj jö sön le resultat de 2 a 0 por le Gais.


Cosciënc de avëi pormetü demassa ai aversars, ciafa i ladins plö grinta y passa al incër le 60^ al’atach. Alex E. é bun da se delibré al limit por fa pié ia na trata sëcia püch sura porta fora. Al 70^ la gran ocajiun: le palé alt vëgn prolungé de ce a Michele C. che röia bel sú dan porta, la trata bassa indere ti fej le pulan al pé de porta. Le Gais stënta sëgn deplö a costruì le jüch, chëra al 75^ é ciamó la sora ocajiun, la trata a bót sigü dal limit röia de püch dlungia ia. La Val chir ciamó a düc i cosc le gol dla bandira mo le sciür dl’arbiter ti tol vigni speranza. Le prestaziun debla da pert di ladins ti fej dessigü mirité la devënta ai padruns de ciasa, che se destaca de cater punc da La Val che romagn al cuarto post de tlassamënt. Tl’ultima partida dla sajun d’altonn mëss i ladins ciaré de se davagné i ultims trëi punc poscibli.


Gais – La Val  3-0


Formaziun La Val: 1. Sepl Kantioler, 2. Luca Pescollderung (dal 45^ Felix Nagler), 3. Marco Sottara, 4. Paolo Vallazza, 5. Christian Dapoz (dal 70^ Adrian Miribung), 6. Franz Tolpeit, 7. Michele Campei, 8. Alexander Miribung (dal 45^ Max Nagler), 9. Samuel Winkler (dal 45^ Martin Ploner), 10. Stefan Sottara – capitan, 11. Alex Elzenbaumer

Proscima partida: La Val süga in duman sabeda ai 11 de novëmber dales 14:30 te ciasa cuntra le Dietenheim


Atri resultac:

Juniores Pool  (Mareo/La Val): Plose – Mareo : 2-1

U15 (La Val): La Val – Vahrn/Neustift: 2-10

U12 (La Val): La Val – Ob. Kobras : 0-6

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©