US LA VAL
 
 
     
 

Reuniun generala 2018

Stampa PDF

Unbenannt

L’Uniun Sport Amatoriala à tigni ai 08 de merz 2018 süa reuniun generala anuala. La reuniun generala é stada na ocajiun por ciarè zoruch al’ativité dl ann 2017 y por porté dant le program preodü por l’ann corënt.

 

 



Le presidënt Alex Alton á danfora saludé i mëmbri che à tut pert ala reuniun por passé spo a traté l’ordin dl dla sëra. Ala fin dl ann denant pò la uniun mostré sö 192 scrić ite. Le scrivan dl’uniun Marco Castlunger é spo passé ala letüra dl protocol dl'ultima sentada.

An é spo passá al cunt consuntîf 2017 y dl bilanz de previjiun 2018, gnüs aprovà al’unanimité cun alzada de man. Dan porté dant l’ativité él gnü presenté le nü consëi cun i compic asegnà a vigni mëmber, che arà le compit de aministré l’uniun cina l’ann 2019.     Al é spo gnü ciaré zeruch al’ultim ann de ativité, i resultać arjunć y le program dl dagnì. La seziun cun la maiú ativité é indô chëra dl jüch dl palé.  Al é gnü porté dant  i resultać y ativité dles scuadres di mituns y jogn. Novité da in chësc ann é la scuadra dl U-8, formada da sogadus plö pici da La val. L'ativité cun i mituns, che rapresentëia le dagnì dl'uniun é tres sté n punt prinzipal dl l'ativité sportiva a La Val, nia ma pro le jüch dl palé mo inće pro la seziun lüsa, de conseguënza vëgnel dé gran pëis a chësc punt. Da alzé fora é in chësc ann la promoziun tla 2° categoria arjunta dala prüma scuadra do la partida de dezijiun cuntra le Lijun ai 07 de jügn 2017. Les scuadres che tôl pert ai campionac FIGC y VSS tratan la sajun 2017/18 é bëgn 7, cun la novité dl’U9, daulache al s’á formé n bel grup de pici sogadus, cun l’alenadëssa Moling Monica y Alex Elzenbaumer a cé. Ales scuadres di campionac daulache al süga sogadus da La Val i vëgnel fat les miûs aodanzes por n bun campionat de retüda.

L'Uniun Sport La Val, en colaboraziun cun scora dl palé “Hans Dorfner” – cun a ce l’ex  sogadù dl FC Bayern München, à organisé dai 24 ai 28 de messé 2017 le „Summer camp“ de n’edema por düć i mituns dla valada nasciüs ti agn 2003 - 2010 che á interesc a soghé al palé.

Pro les ativitês desvalies él gnü porté dant da pêrt dla responsabla Monica Ploner i cursc organisá. Dër aprijá é i grüm de cursc ofris a nüsc paesans y nia ma. Sce an ciara zeruch ai ultims agn pon udëi sciöche chisc cursc vëgn tres deplö chiris, ruvan al numer de partezipanc tratan le 2017 de 285. L’Uniun se cruziarà sambëgn ince tl 2018 de organisé cursc desvalies.

Pro la seziun dla lüsa él gnü porté dant i punć prinzipai dl’ativité. Responsabli dla seziun é Diego Tschaffert adüm a Merch Vallazza. A tó la parora é le talënt Diego Tschaffert che po’ mostrè sö adüm a düta la seziun i bugn plazamënć di alteć dla scuadra da La Val tratan la sajun 2017/18. Cun gran plajëi pon ince udëi sciöche i atlec plö jogn vëgn do ca cun na gran motivaziun (13 mituns), bele te chësta sajun él un o l’ater che à podü ciarcé les competiziuns tradizionales. I plö jogn à tut pert ales gares joniles “Raika” daulache al é gnü arjunt val podesc, tra chisc le pröm post asolut de Brunner Philipp. N gran giulan ti va dal' atra pêrt ai organisadûs y ai acompagnadûs dla seziun, che cun sò gran laûr y sostëgn dà dessigü n gran contribut a tignì alâlt le sport dla lüsa a La Val.

Porté dant él ince gnü i laurs de manutenziun ala plaza sportiva ia n Plans. Dlungia l’ordinaria manutenziun él gnü sostituì les lüms dl ciamp , a gauja dl’omologaziun che ne é nia plö gnüda conzedüda da pert dla federaziun.

Ala reuniun é inće sté presënt l'Ombolt Angel Miribung da La Val che à tignì n discurs sön l'ativité dla uniun y à alzé fora l' importanza dl'ativité sportiva. Ai à ringrazié i funzionars dla uniun por le laûr  y por le impëgn demostré. I complimënc al fat deperpo ales scuadres dl palé y ai bugn resultać arjunć da pert di atlec dla lüsa. Le presidënt à tut l'ocajiun por ringrazié le ombolt por le sostëgn finanziar che vëgn vigni ann conzedü da pêrt dl comun ala uniun.

Cun le discurs dl’ombolt s’à stlüt jö la reuniun anuala dl’Uniun dl Sport La Val, dedo é ciamò düc stà adüm pro val da mangé y da bëre. N bel giulan a düc i presënc y a proscim ann!


Por ciarè ala prejentaziun drüca sön le linch injuntè: prejentaziun

 


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©