US LA VAL
 
 
     
 

8ª partida de campionat rit.- Val Badia

Stampa PDF

Immagine

Te n derby emozionant cina l’ultim menüt é la Val Badia che à la miú cuntra la formaziun de ciasa y se mët insciö i trëi punc te gaiofa.





Al bel publich de spetadus rové adalerch a La Val l’ultim fin dl’edma ti él dessigü gnü pité en derby plajor y interessant, cun le resultat insigü cina l’ultim menüt de jüch. I ghesc concretisëia al miú les ocajiuns dan porta, deperpo che i padruns de ciasa cun en önescmetri falé ti ultims menüc, se arjüma la poscibilité de avalié le resultat.

A mët man cun sbunf é la Val Badia, che arjunj le vantaje bele al 6^ menüt. Ala trata de puniziun dal limit de area se presentëia le capitan Alex S., le palé trat bass y cun prezijiun a giré sön le prüm pé de porta ti lascia püces poscibilites al verdaporta Sepl. I ghesc fej inant presciun y la formaziun de ciasa se limitëia a trà demez le curan. La puniziun trata da Alex E. por La Val al 11^ fej indere tramuré la porta aversara, sfioran de püch la stangia. Do i prüms vint menüc röia ince La Val te partida y gestësc damì les sogades. Insciö ti gareta tosc de porté le resultat sön le pêr: al 29^ röia la trata dal ciantun amez daulach Stefan se fej lerch anter le cajin por rebat le curan de ce dlungia le pé de porta ite. Cun le sciür dl’arbiter y degünes gran ocajiuns da alzé fora, va i sogadus tla palsa sön le resultat de 1 a 1.

Dal mëteman dla secunda pert röia la Val Badia plö motivada te ciamp. Do püc menüc de jüch ti conzed l’arbiter na trata de puniziun püch do la linea de mezciamp. Alex Felder lî bun la lungia crossada y röia cun sbunf a rebat le palé cun potënza cuntra porta, le un da La Val Sepl é chiló bun te n prüm momënt de tigní sö le curan, chësc indere ti sciampa fora dles mans y röia de püch it da la linea de porta. L’arbiter conzed insciö atira le gol dl vantaje. Do le gol se lascia i ghesc do fora y la formaziun de ciasa se alza a chirì la dërta ocajiun por se refà. Les bunes aziuns costruides vëgn indere pozorades da les contlujiuns scialdi debles. La Val crëi impó inant y la orenté vëgn spo recompensada cun en önescmetri conzedü dal mandl fosch al 81^ por en fal de man tla defenjiun aversara. Ala mascima puniziun se presentëia Michele Campei: la fortüna ne é nia da süa pert, la trata nia sigüda fej ruvé le curan dlungia porta ia. A respogn è spo i aversars che pëia ia in cuntrapé, le palé porté cina jö insom al ciamp vëgn preparé amez por Alex F. sú dan le portier, la trata a püc metri dan porta röia indere de tröp sura porta fora. Ti ultims menüc de jüch pro ciamó La Val de abiné le pêr sënza ti ester. Le sciür dla fin ti destüda vigni speranza ai patruns de ciasa. Le derby y i trëi punc d’or ti va in chësc iade ala Val Badia che pó speré inant tla salvëza a trëi partides dala fin dl campionat. La Val mëss deperpo dlotí na pordüda ajia, speran de cöi adüm ciamó val punc in plö tl’ultima pert dla sajun.


La Val – Val Badia  1-2


Formaziun La Val: 1. Sepl Kantioler, 2. Christian dapoz, 3. Werner Sottara, 4. Paolo Vallazza, 5. Marco Castlunger, 6. Michele Campei, 7. Max Nagler (dal 61^ Alexander Miribung), 8. Franz Tolpeit, 9. Samuel Winkler (dal 79^ Christian Terza), 10. Stefan Sottara - capitan, 11. Alex Elzenbaumer


Formaziun Val Badia: 1. Rene Ferdigg, 2. Andrea Conrater, 3. Mattia Kastlunger, 4. Gianluca Lorenzini, 5. Samuel Vittur, 6. Florian Barbolini, 7. Alexander Ploner, 8. Alex Stampfer, 9. Davide Fontanive, 10. Nicola Zuliani (dal 65^ Andrea Pedevilla), 11. Alex Felder


Goi: Alex Stampfer al 6^, Stefan Sottara al 29^, Alex Felder al 50^

Proscimes partides: La Val süga in domenia dales 16:00 le derby a Al Plan cuntra la scuadra de ciasa deperpo che la Val Badia ospiteia le Rina te ciasa tres dala medema ora.


Atri resultac:

Altherren (La Val): La Val – Terenten 1-3

Juniores Pool: Feldthurns – Mareo 2-0

U-15 (La Val) Vahrn – La Val 3-0

U-12 (La Val) La Val – Obopuschtra Jugend 0-5

U – 9 (La Val) La Val – Burnech 1-4

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©