US LA VAL
 
 
     
 

11ª partida de campionat rit.- Dietenheim

Stampa PDF

foto_scuadra

Cun na gran reaziun avaliëia i ladins le resultat ti ultims menüc y se porta a ciasa ciamó n ultim punt por stlü jö en bel campionat.





Tl’ultima partida de campionat se mosöra La Val cun i aversars da Dietenheim, alenà dal ex alenadú dl La Val “Tano” y oramai tumà jö te categoria. Por i ladins l’ultima ocajiun de cöie adüm ciamó val punc, ala fin saltel fora en punt porom. Do en debl pröm tëmp, é la reaziun dl La Val tla secunda pert che ti fej avalié le dopl vantaje di padruns de ciasa.

Al é le Dietenheim che pëia ia cun sbunf y arjunj bel al 12^ le vantaje sön na situaziun standard. Cun le ciamp strënt anuzëia i aversars la lungia remetüda por rebat le palé cun le ce de porta. La Val s’á tres stenté sön i standard y ince in chësc iade ne éra nia jüda da fa damì. Le Dietenheim anuzëia bun la formaziun di sogadus ladins sön le ciamp, trö massa fora dla posiziun y manacia plö iadi de ruvé al gol. Insciö ti gareta ince tosc le dopl vantaje: sön en contrast te area ladina conzed l’arbiter la mascima punizun che vëgn trasformada dal sogadú Oberhammer. Al 35^ l’ocajiun por La Val, la crossada amesa area vëgn controlada da Alexander che pro la trata cuntra porta, indere dlungia ia. Ince i padruns de ciasa pro ciamó sön na remetüda de stlü jö la partida, chilò é Sepl reatif y tigní sö la rebatüda de ce.


Le pröm temp se stlüj jö cun le resultat de 2 a 0 por le Dietenheim


Tla secunda pert röia i ladins cun plö determinaziun de ciamp, les parores dl’alenadú Hilber fej faziun y al 58^ ti gareta al La Val le gol. Alex E. vëgn sorví dal mezciamp y pro la trata diagonala, daulach Alexander M. pó apogé te porta. Do le gol ladin se desceda indo i aversars y fej presciun sön i portadus dl palé, sües ripartënzes vëgn indere architades dal mür defensif dl La Val. La partida röia tl’ultima fasa de jüch, olache la formaziun di ghesc mëss rischié val inplö, chësta mudaziun dla formaziun porta sü früc y püc menüc dan la fin conzed le mandl fosc le önescmetri por La Val: le sogadú Philipp vëgn contrasté te area aversara. Le sogadú designé ala trata é le capitan Stefan che fej scassé la rëi y avaliëia insciö le resultat. Ti ultims menüc de jüch ne gareta plö degun gol. Cun les protestes di sogadus aversars por le önescmetri conzedü, sciüra l’arbiter la fin dla partida y ince dl campionat.

Por La Val se stlüj ia la prüma sajun de aventüra te 2ª categoria, en ann plëgn de emoziuns che ti à pormetü de arjunje bëgn 29 punc y se posizioné al 6° post de tlassifica. En gran travert arjunt cun le tigní adüm de düt le grup y le sostëgn da pert dl diretif y sambëgn de düc i sostenidus. De chësc vers en gran giulan a düc canc y a s’udëi indo da d’altonn!


Dietenheim – La Val 2-2


Formaziun La Val: 1. Sepl Kantioler, 2. Martin Ploner (dal 60^ Marco Sottara), 3. Egon Frenes (dal 46^ Simon Campei), 4. Paolo Vallazza, 5. Marco Castlunger, 6. Michele Campei (dal 46^ Philipp Moling), 7. Felix Nagler (dal 46^ Alex Ploner), 8. Christian Dapoz, 9. Alexander Miribung, 10. Stefan Sottara – capitan, 11. Samuel Winkler (dal 46^ Alex Elzenbaumer)

Alenadú: Gerhard Hilber

Goi por La Val: Alexander Miribung al 58^ y Stefan Sottara al 88^


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©