US LA VAL
 
 
     
 

La pista dla furnela

Stampa PDF

An adorâ na pista nöia

 

 

FIL03903

 

Deache le sport dla lüsa ê de gran inte­rès tl paîsc, él gnü baié ti agn 1974/75 de fá na pista nöia por la lüsa, che core­spo­gness ales esigënzes dles gares y ales nor­mes scrítes dant dala federaziun. Al ê deplü posc’ che gnê tuc’ en con­sci­dra­ziun: dala tofla (olache al é sëgn le tra­vert dla Furnela) fina jö en Plans y spo dô l'ega fòra, le trú vedl dla Furnela, sot Coz jö y fòra Mirió y Plans. Inultima él gnü tut la dezijiun da fá na strada nöia söla Furnela, che podô ince gní anuzada sciöche strada fo­restala y de colegamënt cun i prá d'Ar­men­tara. Implü ê chësc post bel alporsorí y ince la pen­dënza jê dër bun.

La strada é gnüda fata ti agn 1975/76 dala interes­sën­za di proprie­tars che ne n'ê atira nia düc’ a üna. Che á fistidié dla rea­li­sa­ziun dla pista nöia él stè le presidënt da laôta, Tino Alton.

 

Pista Furnela 

lungia

cürta

Lunghëza

1908 m

1180 m

Deslivel

224 m

177 m

Pendënza mascima

18%

20%

Pendënza minima

8.5%

8.5%

Pendënza mesana

11%

15%

Numer dles otes

27

23

Record dla pista

1.51,20 1)

1.26,06 2)

 

1) Otto Bachmann (RV Kronplatz) ai 01.03.81

2) Reinhard Gruber (RG Latzfons/Verd.) ai 04.02.96

 

 

Üna dles plü beles pistes

La Furnela ti á por sües cara­teri­stiches tecniches tres dër plajü ai sportîfs dla lüsa. Porchël gnê dagnë­ra düc’ canc’ gion söla pista da La Val a garejé. Chësc vêl ince al­de­daincö ciamò, olache la pista Furnela pò gní con­sci­drada üna dles plü beles de nosta Provinzia.

Fina l'ann 1985 é les gares gnüdes fates söla pista lungia, spo él gnü spostè le start zirca 700 metri plü a val. Ti agn canche la pista ê gnüda fata parôl che al messass éster chësta lunghëza, dedô é la tendënza gnüda chëra da scortè les pistes, ince por la reduziun dles spëises por l'arjignamënt.

I agn dal 1977 inant, cun la daurida dla pista nöia dla Furnela, é stá i agn cun la maiú ativité dl U.S. La Val tla seziun dla lüsa, cun l'organisaziun de n valgünes gares a livel internazional. La prüma gara söla pista nöia dla Furnela é gnüda fata ai 30.01.1977. Ara se tratâ de na gara de cua­li­fica­ziun zonala, che é gnüda davagnada da n atlet da La Val, Tone Alton.

L'inauguraziun ofiziala dla Furnela é gnüda fata tl ann 1978, plü avisa ai 24 de forá, en ocajiun dla daurida dl "V. Gran Pre­mio d'Italia". Por chësta ocajiun, olache la pista é ince gnüda benedida, él gnü fat na gran festa, cun fiacolada y sfilada dla mu­siga da La Val. Ti agn che vëgn dô é la Fur­nela stada n punt de incuntada di sportîfs dla lüsa a livel nazional y ince internazional.

 

 

Arjignamënt dla pista

Por l'organisaziun de gares zonales y na­zio­nales mëss le funz dla pista éster comple­ta­mënter dlacè. Sce al é nëi te pista spo ne n'é i concorënc’ nia bugn da se gurné la lüsa, deache ara ne tëgn nia íte tles otes. Insciö comporta l'arjignamënt dla pista vigni ann de gran bríes y ince de gran spëises por l'Uniun. Les gran cuantitês d'ega (zirca 70.000 - 80.000 litri al invern) mëss gní con­dütes sö cun le camion. Fina che le funz dla pista ne n'é nia dlacè indortüra él vigni iade le camion che la rovina y moscëda sö giara. Le laûr por l'arji­gnamënt dla pista é insciö dër gran. Implü mëssel vigni ann da d'altonn gní dortoré sö la strada dai danns gaujá dal tëmp.

 

La pista mëss gní restrotorada

Por alisiré l'arjignamënt dla pista jíssel debojëgn da arjigné n implant da bagné. L'idea da arjigné na condüta dal'ega cun idranc’ dô pista jö por sparagné i gragn cosc’ da condüje sö l'ega é bele stada argomënt de discu­sciun tl consëi d'amini­stra­ziun dl'Uniun. An podess tó l'ega fòra dla vasca che cöi sö l'ega por la zona dl sport. Mo an messass cöie sö damí l'ega, deache ti mëisc da d'invern él n pü' la meseria. Cun la metüda de na con­düta dal'ega podéssel in­ce gní ciavè íte le fí de co­le­ga­mënt danter le start y le travert, che mëss atual­mën­ter gní metü vigni ann dô pista jö por cronometrè les gares. N ater laûr che jíss debo­jëgn por adatè la pista ales esigënzes atuales é chël de ingrandí la ütia jö dal tra­vert, che messass ince gní coliada ala rëi ele­trica. Düc’ chisc intervënc’ costa sambëgn tröc’ scioldi y an spera che ara vais n püch al iade da i realisé. Zënza ne sarâl nia plü meso da arjigné ca massa dî la pista y l'or­ga­nisaziun de gares podess ti proscims agn gní metüda en discusciun. Danter i funzionars dl'Uniun él ince gnü baié söla proposta da comedé l'ultima pert dla pista, a na maníera che ara rovass jö dala zona dl sport Plans. La poscibilité da fá le travert jö tla zona sportiva foss de gran ütl por l'organisaziun dles gares. An podess anuzè les infrastrotüres bele realisades (plaza por i auti, forza eletrica, sorvisc igienics, bar) y implü foss la pista plü daimprò dal paîsc.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©