US LA VAL
 
 
     
 

Reuniun generala 2019

Stampa PDF

Immagine

L’Uniun Sport Amatoriala à tigni ai 08 de merz 2019 süa reuniun generala anuala. La reuniun generala é stada na ocajiun por ciarè zoruch al’ativité dl ann 2018 y por porté dant le program preodü por l’ann corënt.

 

 



Le presidënt Alex Alton á danfora saludé i mëmbri che à tut pert ala reuniun por passé spo a traté l’ordin dl dla sëra. Ala fin dl ann denant pò la uniun mostré sö 230 scrić ite.

An é spo passá al cunt consuntîf 2018 y dl bilanz de previjiun 2019, gnüs aprové al’unanimité cun alzada de man. Dan porté dant l’ativité él gnü presenté consëi corënt cun i compic asegná a vigni mëmber, che é le compit de aministré l’uniun ince tratan chësc ann, denant che al sará indo les lites le proscim ann. Al é spo gnü ciaré zeruch al’ultim ann de ativité, i resultac arjunc y le program dl dagnì. La seziun cun la maiú ativité é indô chëra dl jüch dl palé.  Al é gnü porté dant  i resultać y ativité dles scuadres di mituns y jogn. Bëgn 7 scuadres, ulache al süga sogadus da La Val á tut pert ai campionac FIGC y VSS tla sajun 2017/18. L'ativité cun i mituns, che rapresentëia le dagnì dl'uniun é tres sté n punt prinzipal dl l'ativité sportiva a La Val, nia ma pro le jüch dl palé mo inće pro la seziun lüsa, de conseguënza vëgnel dé gran pëis a chësc punt. Les scuadres che tôl pert ai campionac FIGC y VSS tratan la sajun 2018/19 é indo set, cun en U-10 y n U-8, daulache al é ince gnü porvé de tigní val alenamënt por chi ciamó plö jogn. Ales scuadres di campionac daulache al süga sogadus da La Val i vëgnel fat les miûs aodanzes por n bun campionat de retüda.

L'Uniun Sport La Val, en colaboraziun cun le F.C. Südtirol, é organisé dai 23 ai 27 de messé 2018 le „Alperia Junior Camp“ de n’edema por düć i mituns dla valada che á interesc a soghé al palé. Le suzes dl’ann denant á fat da fondamënta por jí inant cun le proiet ince chësc isté.

Pro les ativitês desvalies él gnü porté dant da pêrt i cursc organisá. Dër aprijá é i grüm de cursc ofris a nüsc paesans y nia ma. Sce an ciara zeruch ai ultims agn pon udëi sciöche chisc cursc vëgn tres deplö chiris, ruvan al numer de partezipanc tratan le 2018 de 282. L’Uniun se cruziarà sambëgn ince tl 2019 de organisé cursc desvalies.Novité tl’ann 2019 é la gestiun dla palestra, che é passada diretamënter al comun. Al vëgn inc lascé alsavëi che i cursc che gnará organisá y le sistem dles iscriziuns ne müda nia.

Pro la seziun dla lüsa él gnü porté dant i punć prinzipai dl’ativité. Responsabli dla seziun é Diego Tschaffert adüm a Ivan Tschaffert. A tó la parora é le Ivan Tschaffert, che á cunté sura i campionsc europeics de lüsa alta y lüsa da fëgn, tigní tratan le prüm fin dl’edema de furá. Le bel evënt è gnü aprijé lunc y lerch y l’uniun adüm ala seziun lüsa, la jonëza da paur y i stodafüch pó ciaré zeruch a na manifestaziun plö che garatada. La seziun lüsa pó indo, sciöche vigni ann, mostré sö na schira de bugn resultac arjunc fora por la sajun invernala 2018/19. Cun gran plajëi pon ince udëi sciöche i atlec plö jogn vëgn do ca cun na gran motivaziun, bele te chësta sajun él un o l’ater che à podü ciarcé les competiziuns tradizionales. I plö jogn é tut pert ales gares joniles “Raika” daulache al é gnü arjunt val podesc, tra chisc le pröm post de Matthias Moling y Peccei Lara. N gran giulan ti va dal' atra pêrt ai organisadûs y ai acompagnadûs dla seziun, dandadüt a Diego y Shamira, che cun sé gran laûr y sostëgn da dessigü n gran contribut a tignì alâlt le sport dla lüsa a La Val.

Diego Tschaffert ne é nia ma en talënt sön i liösti, süa pasciun por le salté sö por munt l’à porté tl’otober 2018 sön la picera isola franzeja “La Reunion” tl’Africa, daulache al á tut pert ala gara de Ultra Trail “Diagonale des Fous”, cun en percurs de 165 km y n deslivel de 9.576 metri. So resultat é ejemplar, do bëgn 32.36,29 ores al taié le travert y s’á posizioné al 50° post asolut. Na prestaziun dessigü nia da vigni dé! De chësc vers se congratulëia düta l’uniun por le resultat arjunt y ti augurëia a Diego düt le bun por chësta pasciun!

Al é ince gnü presenté in cürt le program por l’ann 2019, cun valgünes novites tl’organisaziun di evënc.

Ala reuniun é ince sté presënt l'Ombolt Angel Miribung da La Val che á saludé i presënc y á tignì n discurs sön l'ativité dla uniun alzan fora l'importanza dl'ativité sportiva. Al á ince urü se sofermé sön le suzes dla EM, alzan fora la colaboraziun danter i paisc da Lungiarü y La Val y les uniuns dl paisc. Al é ringrazié i funzionars dla uniun por le laûr  y por le impëgn demostré. I complimënc al fat deperpo ales scuadres dl palé y ai bugn resultac arjunc da pert di atlec dla lüsa. Le presidënt á tut l'ocajiun por ringrazié le ombolt por le sostëgn finanziar che vëgn vigni ann conzedü da pêrt dl comun ala uniun.

Cun le discurs dl’ombolt s’à stlüt jö la reuniun anuala dl’Uniun dl Sport La Val, dedo é ciamò düc sta adüm pro val da mangé y da bëre. N bel giulan a düc i presënc y a proscim ann!


Por ciarè ala prejentaziun drüca sön le linch injuntè: prejentaziun

 


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©