2ª partida de campionat rit. - Tasten
La Val röia dlungia ala prüma devënta te campionat. Do ester jüs in vanataje te ciasa tla prüma pert dla partida, avaliëia i aversars le resultat tl’ultim cun na trata dai önescmetri.
I averars da Tasten é ruvá adalerch a La Val l’ultima sabeda por se sughé la secunda partida dla sajun. I ghesc de ciasa mostra na bela reaziun al’ultima pordüda y defënn le vantaje arjunt tl prüm tëmp cina cinch menüc dala fin, daulache en önescmetri batü dai aversars avaliëia le resultat.
Bele atira é i ladins posizioná bun te ciamp y mostra segurëza cun le jüch bass. Insciö ti gareta ince val bela aziun che i porta dan porta, ince sce les contlujiuns ne vëgn nia daldöt concretisades. Al 22^ menüt indere davagna La Val na trata dal ciantun che vëgn batüda da Micky, le palé röia âlt por Alex E. sú dan porta: cun en bel colp de ce cuntra porta ne á le portier dl Tasten degüna poscibilité da paré. Do le vantaje ladin se descëda l’aversar y devënta prigorus sot porta de ciasa. Sön na remetüda al 35^ vëgn le curan prolungé cuntra porta, chiló mëss le un da La Val Sepl se destrá por desfanté le palé. Dan le pröm tëmp pro ciamó Luca P. de radoplé le vantaje cun na trata dal limit che röia indere dlungia porta ia.
Tla secunda pert röia l’aversar plö sterch te ciamp, chiló é Sepl che fej cun savëi só laur, paran deplö trates cuntra porta. Al 60^ röia Alex E. ala crossada por Adrian che röia sú dan le portier, la rebatüda de ce é indere de püch massa alta. Le nervosism che mët man da se fa sintí te ciamp vëgn tigní sot a control dal’arbiter, che se fej respeté cun les chertes d’amoniziun ala man. Sön n’aziun aversara al 85^ ti sciampa l’atacant ala defenjiun y ti röia adôs al defensur zentral tuman a tera. N fal evidënt che ne pó nia gní contesté. Le önescmetri conzedü fej impó dessené i ladins che á defenü cun savëi le vantaje cina püc menüc dala fin. A bót sigü tira le sogadú Peinter le palé te porta y avaliëia insciö le resultat. I sogadus de ciasa pro ciamó por le cürt tëmp che al resta de remunté le pêr, al 88^ röia na crossada amez por Adrian che pro ciamó en iade la trata, indere massa debla. Da alzé fora ince en önescmetri der tl dübe nia conzedü dal arbiter tl’ultim menüt de jüch. Cun gran desplajëi mëss i ladins partí i punc cun i Pustri, do avëi mostré na bela prestaziun.
La Val – Tasten 1-1
Formaziun La Val: 1. Sepl Kantioler, 2. Marco Sottara, 3. Luca Pescollderung (dal 75^ Egon Frenes), 4. Christian Dapoz, 5. Paolo Vallazza, 6. Castlunger Marco, 7. Micky Frenes (dal 80^ Martin Ploner), 8. Christian Terza, 9. Alex Elzenbaumer, 10. Stefan Sottara – capitan (dal 70^ Adrian Miribung), 11. Michele Campei (dal 35^ Franz Tolpeit)
Proscima partida: La Val süga süa proscima partida induman sabeda dales 15:00 a San Laurenz cuntra la scuadra de ciasa
Atri resultac:
Juniores Pool (La Val/Mareo/Rina/Val Badia): Tlüses – La Val: 1-0
Aliefs (Mareo/La Val): Mareo – Gitschberg Jochtal: 2-6
