US LA VAL
 
 
     
 

11ª partida de campionat rit. - Alta Val de Puster

Stampa PDF

_MG_925277

L’ultim fin dl’edema s’á ruvé por la scuadra da La Val l‘aventüra te secunda categoria. Cun la pordüda cuntra l’Alta Val de Puster perd i ladins la ferata por la salvëza.






Cun l’ultima partida de campionat se stlüj ince jö l’aventüra de secunda categoria por la scuadra da La Val. Do döes sajuns te chësc livel dl palé mëss fa i ladin en vare zeruch por met man danü.

Tla partida cuntra l’alta val de puster mostra la formaziun de Massa na prestaziun nia al altëza y mëss dlotí na devënta pesocia che ti tol vigni speranza tla salvëza. Ince cun na devënta cuntra i pustri ne ess La Val nia podü ciaré inant a na partida de dezijiun, sce an ciara ala devënta dl Vandoies cuntra i campiuns da Lijun y dla Val Badia cuntra le San Laurënz. De chësc vers se congratulëia la scuadra cun nüsc vijins ladins, che s’á batü cun convinziun por se tigní le post de categoria.

I ladins pro fora en ciamp nü, bel da valgügn agn ne gnel nia plö sughé sön la plaza dl palé da Toblach. Le gran ciamp á metü in dificolté i ladins, bele ti prüms menüc stënta i sogadus da tigní la posiziun y insciö ala cherd’ora ti sciampa l’atacant dërt da na pert jö y crossëia amez por le sterch Bosa Alan, che controlëia le palé a dovëi y tira sëech sön le pé lunch por le vantaje. Püch plö tert al 30^ conzed l’arbiter la mascima punziun por en fal de man, chiló se presentëia l’ atacant Prenn ala trata y la trasformëia cun segurté. Bele dui goi ala mesora y por i ladins devënta insciö la situaziun critica. Bel plan se ciafa indo i ghesc y impostëia ince val aziun dan porta, le sanch frëit mancia indere y insciö bunes ocajiuns ne vëgn nia anuzades y concretisades sciöche al toca. Gran ocajiun di padruns de ciasa püch dan le prüm tëmp: la bela trata de puniziun dal limit fej tramuré i ladins, chiló é le portier Sepl  che se destira y fej en miraco, le palé vëgn desfanté cun na gran parada.

Tla secunda pert röia i ladins te ciamp cun plö convinziun y controlëia le jüch por val menüc. Intres él indere i aversars che anuzëia le vantaje dl ciamp por interzeté les passajes, y chësc i costa ince le terzo gol ai ladins. Al 76^ driblëia Schwarz la defenjiun y pro la trata de ciamp sön le prüm pé de porta che ti gareta ince. I ladins ne se lascia de demoralisé y chir inant le gol, chësc ti gareta ince in pert, indere plö co ater na scincunda, canche al 85^ pro le defensur en stach de ce por passé zeruch le curan al portier, chiló é le palé massa alt y ti fej da palonët sura fora, ruvan te porta por le gol dla bandiera. I menüc por recuperé passa trö massa snel y le sciür dl’arbiter detlarëia la fin dla partida. Sënza ciaré ai atri resultac mëss i ladins azeté só destin, la retrozesciun te terza categoria. En resultat che dejplej dër, sce an ciara ala convinziun dl grup che ne é mai jüda a perd, dandaldüt  tl’ultimo tëmp, olache vigni punt ê dezisiv por la salvëza. De chësc vers pon alzé fora la forza dl grup, che é intres indo gnüda alimentada da les parores de motivaziun da pert de nosc alenadú Luca Massa, che á salpü da motivé al miú düta la scuadra fora por düta la sajun de retüda.

Sëgn él ora de fa en vare zeruch y ciaré inant ala nöia sajun che n’es aspeta, cun nöia convinziun y nüs obietifs. De chësc vers ringaziunse de cör le publich de ciasa por le sostëgn ciafé cina la fin y por ester sté intres nosc dodejim sogadú te ciamp. Giulan y a s’odëi indo d’altonn!


Alta Val de Puster – La Val  3-1


Formaziun La Val: 1. Sepl Kantioler, 2. Fabian Moling, 3. Egon Frenes (dal 46^ Christian Terza), 4. Christian Dapoz, 5. Marco Castlunger, 6. Paolo Vallazza, 7. Micky Frenes (dal 77^ Adrian Miribung), 8. Max Nagler (dal 60^ Philipp Moling), 9. Franz Tolpeit (dal 80^ Alex Ploner), 10. Stefan Sottara – capitan, 11. Alex Elzenbaumer


Atri resultac:

Altherren (La Val): Dietenheim – La Val 0-1

Juniores Pool (La Val/Mareo/Rina/Val Badia): La Val – Pichl Gsies: 3-0

Aliefs (Mareo/La Val): Virtus Balsan – Mareo: 9-1

U-13 (La Val): La Val – Val Badia 2-5

U-10 (La Val): Valdaora – La Val 4-2


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©