US LA VAL
 
 
     
 

11ª partida de campionat - Raas

Stampa PDF

DSCF19d60

La Val stlüj jö la sajun d’altonn cun na bela devënta, remuntan le svantaje tomé ti prüms menüc.

 




De avëi en ciamp vërt por sughé, dô la nuvüda dl vëndres, êl püc che se punsâ. Cun l’aiüt de deplö aiutanc él indere sté meso delibré le ciamp curí dala nëi pesocia y pormët insciö de podëi sughé l’ultima partida de chësta sajun d’altonn. De chësc vers vëgnel rengrazié düc chi che s’á trat ite les manies ruvan adalerch a dé na man! Por le scomenciamënt dla partida s’á insciö presenté le ciamp te condiziuns otimales por sughé, demorvöia ince por i aversars ruvá adalerch trö denant por valuté sce sughé o nia.

Le mëteman ne é indere nia le miú por La Val che va bel in svantaje al 5^. Sön aziun preparëia l’atach le palé amez area por le compagn Pliger, che röia a dërt post por apogé te porta. La duscia frëida descëda i ladins, che prô de costruí le jüch cun passajes basses, chëstes indere nia tres prezijes, ti dan insciö la poscibilité a repartënzes aversares. Impormó al 35^ avaliëia Alex E. le resultat: a mezciamp perd le defensur le palé, l’atacant ladin é asvelt y se chir le trú cuntra porta por trá sëch sön le pé lunch. Le La Val á sëgn le jüch tles mans mo ne abina impone nia le gol dan la fin dl pröm tëmp.

Al 48^ é Christian Terza che controlëia bun le palé dai vint metri y fej pié ia na trata a bót sigü, chiló mëss le un dl Raas se destrà por deloj te ciantun. Le gol dl vantaje toma spo al 65^: la bela combinaziun danter Alex y Christian i fej ruvé da na pert por trá cuntra porta, le curan rebatü dal portier vëgn ciamó abiné da Stefan che á ma plö bria dl apogé te rëi. I sogadús dl Raas se fej ciamó prigorusc sön na trata sëcia dal limit, desfantada cun savëei dal verdaporta Nathan. Al 80^ driblëia spo Alex E. ciamó en iade la defenjiun y tira dal limit indirizan le palé sön le prüm pé de porta. Chësc gol ti taia les giames ai aversars che ne é nia plö bugn de reagí. Insciö sciüra tosc l’arbiter la fin di nonanta menüc y stlüj ince jö la sajun d’altonn por La Val. Dô che le campionat é scomencé nia dl miú vers, lascian punc importanc sön strada, s’á le grup mioré, ruvan a cöie i früc tles ultimes partides. Sëgn pó i sogadus jí tla palsa da d’invern a recuperé nöies forzes y se preparé ala desfida dla sajun de retüda.


La Val – Raas 3-1


Formaziun La Val: 1. Nathan Massa, 2. Michele Campei (80^ Philip Moling), 3. Paolo Vallazza, 4. Marco Castlunger (75^ Fabian Moling), 5. Luca Pescollderung, 6. Christian Dapoz, 7. Christian Terza (80^ Luca Bernardi), 8. Ivan Tschaffert (65^ Max Nagler), 9. Alex Ploner (60^ Egon Frenes), 10. Stefan Sottara – capitan, 11. Alex Elzenbaumer


Atri resultac:

Giovanissimi (Val Badia): Val Badia  – Pichl Gsies 1-1

 


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©