Por fá les competiziuns sportives plü in­te­res­santes y por trá íte plü jënt gnêl gonot or­ga­nisé gares combinades. Al gnê stu­dié fòra de vigni sort de sistems por arcumpedè adüm i tëmps tles desvalíes disciplines y por abiné insciö fòra inultima l’atlet cun le miú resultat complessîf. Datrai gnêl ince fat gares combinades a copies. Un n iade él por ejëmpl gnü fat na gara combinada a copies danter lüsa, schi y chidlé: un messâ jí cun la lüsa, l'ater cui schi y in­ul­tima êl ciamò trami dui che messâ chidlé. Plü gonot gnêl fat combinades danter lü­sa y schi. Les döes gares gnê fates trames le medem dé, üna danmisdé y l'atra dô­misdé. Tl ann 1987 él gnü fat na gara combi­nada danter 4 disciplines: lüsa, schi, jadins y paslunch, davagnada da Richard Miri­bung da Cians. L'ann dô él gnü fat na combinada danter 5 gares: lüsa, schi, jadins, paslunch y chidlé. Chësta gara é gnüda davagnada da Otmar Moling. L'ultima gara combinada é gnüda fata tl ann 1992 y plü avisa danter les disciplines schi, lüsa y paslunch. Chësta é gnüda dava­gnada da Otmar Moling y Sepl Miribung (Pidrô) che á trami dui arjunt le medem nu­mer de punc’. Les gares de paslunch gnê scialdi ti­gni­des söla loipa da S. Ciascian. L'ul­tima, tl ann 1992, é gnüda orga­ni­sada söla pista a Pidrô dô l'ega íte. En chë­sta oca­jiun él stè Oscar Campei che á da­va­gné la gara. Tratan la gara de paslunch tignida a Pidrô tl ann 1992, varënta por la combinada cun les gares di schi y dla lüsa.