Campionat tla Val Badia

Stampa

FIL09796 

 

 

 

 

 

 

 

 

 

 

 

 

 

 

  

Cô á pa le jüch dl palè metü man?


I prüms pîsc al palè

Le sport dl palè á metü sües raîsc a La Val ti prüms agn dl 70, cun le scomencia­mënt dl campionat dla Val Badia. Denant ne gnê chësc sport nia pratiché danter la jënt dl paîsc y l'ativité sportiva ê dantadüt orientada al sport dla lüsa.

La ligrëza por chësc sport é gnüda portada tl paîsc da jogn che jê foradecá a studié. Dailò rovâi en contat cun le gran entusiasm por le jüch dl palè danter i stu­dënc’, y ai gnê prò vigni dé da soghé al palè. Insciö âi portè chësc sport te nosc paîsc, olache l'interès danter i jogn se slariâ fòra dër snel. Le crësce dla ligrëza por le jüch dl palè é propi ince stada na sbürla por la fondaziun dl'Uniun dl Sport.

I prüms sogadus dl palè a La Val ê Giu­vani y Erwin Frenes, Tone Alton, Giuvani Rives, Robert y Paul Sottara, Sepl y Albert Colz, Zeno y Carlo Agreiter.

 

FIL03901

Üna dles prümes scuadres dl palè da La Val (incër l’ann 1971) - impé da man ciampa: Tino Alton, Erwin Frenes, Zeno Agreiter, Carlo Agreiter, Sepl Sottara, Rinaldo Ploner, Scebio Sottara. Cufá: Robert Sottara, Giuvani Frenes, Sepl Tavella, Albert Sottara, Giuvani Rives.

 


 

Les prümes partides

 

FIL16726

I sogadus dl palè da Runch impé da man ciampa: Filippo Comploi,  Sepl Costabiei, Giuvani y Guido Pezzei. Cufá: Andrè Costabiei, Gottfried Pezzei, Franzl Costabiei.

  

 


La prüma partida che la scua­dra da La Val á soghé é stada cun­tra S. Martin. I so­ga­dus da La Val á finamai da­vagné chësta prüma par­tida, sogada söla plaza dal palè da S. Martin. Por soghé chësta par­­tida â la scuadra messü se impre­stè les malies, deache an n'ún n'â ciamò de­gü­nes in­stësc. Mo tosc á spo i soga­dus ince ciafè les prümes malies che é gnüdes spon­sorisa­des dala Firma Liquigas y é gnü­des fates avëi da Clemente Moling.

La prüma plaza dal palè jö S. Mar­tin ê amesa le bosch íte, tla localité Pradél, y ara ê dër pi­cera; al gnê soghé cun 6 -7 sogadus por scuadra. Les mosüres dles por­tes n'ê sam­bëgn gnanca regolares. Plü tert an metü man da soghé tl prè dl Tasser, ince tla loca­­lité Pradél. Mo te chësc post podôl impor­­mò gní soghé dô che le pro­prietar â rové de sié.

Cabines da se mudê ne savô gnanca ciamò degügn cî che ê; dô la partida jê i sogadus ía dala Gran Ega a se lavè jö l'assoiûs. L'ega de rü ne gnê nia mâ tuta da se lavè, mo ara jê ince bun da se parè la maiú sëi.

Le jüch dl palé gnê laôta tl prüm conzepí düt atramënter co aldedaincö: le miú sogadú gnê aratè chël ch'ê bun da trá le palè plü dassënn y plü dalunc’. Insciö êl n iade sozedü söla plaza da S. Martin, che n sogadú da La Val che orô trá le palè bëgn dër dassënn, ti á dè tan dô ch'al é rové da vider dla caserma di Carabinieri íte, che ê dlungia la plaza dal palè. Deache al ê mâ n palè su a desposiziun ara insciö duré bin­de­bò dî fina che chësc ê indô stè recuperè y la partida á podü gní sogada inant.

Ince laôta gnêl bele soghé de vigni sort de partides danter la jënt dl paîsc: danter jogn y maridá, vedli y jogn o partides dan­ter uniuns. Al gnê dër tröpa jënt a ciarè prò y a sostigní les scuadres. I sogadus dla scuadra ne podô nia tó pert a chîsc tornei tl paîsc. Podëi fá pert dla scuadra dl paîsc ê laôta n gran onur. I sogadus dla scuadra gnê dër respetà y reconesciüs dala jënt.


Chi da La Val â le maiú numer de tifosi

La scuadra da La Val ê laôta conesciüda tla Val Badia por le gran numer de tifosi che ti jê dô a ciarè ales partides y a sostigní i sogadus. Sides i jogn che ince jënt plü vedla dl paîsc ne se jomâ nia ía da jí a ciarè prò y a tigní sö "süa" scuadra. Laôta n'êl sambëgn nia sciöche aldedaincö che vignun á l'auto. Chi che ê zënza jê dô "a autostop" o scenò êl Clemente Moling o Giuvani Rubatscher che ne n ciariâ íte tröc te so pulmin. Canche l'auto ê plëgn sozedôl ince datrai che val­gügn messâ se acontentè da stè te cofano por podëi jí a ciarè la partida. Al gnê dit che chi da La Val â le maiú numer de tifosi de dütes les scuadres dla Val Badia. Ince sce i resultac’ ne ciarâ datrai nia fòra massa bun y sce la gran pert di tifosi n'ê dessigü nia i maius esperc’ dl sport dl palè, ti savôl ala jënt impò bel da jí a ciarè prò.

N iade él finamai gnü fat na invajiun di tifosi söla plaza dal palè. Chësc ê sozedü tratan na partida de campionat dla Val Badia cuntra la scuadra da S. Martin, che ê tres üna dles partides plü cialdes. A 10 menüc’ dala fin dla partida êl stè l'árbiter che n’â nia conzedü na puniziun dai 11 metri por la scuadra da La Val por n fal de man tl'area de strauf. Sön chësta êl stè n valgügn tifosi da La Val che é piá jö y íte tla plaza dal palè y düc’ i atri é jüs dô. Val tifosi dles döes scuadres s'é finamai saltá íte. L'árbiter, n scior che ê en vacanza sö dal Tasser, â por fortüna pordejü da s'un sciampè. Tratan l'édema dô él spo gnü fat de gran discusciuns por tó na dezijiun söl resultat dla partida che ne n'á nia podü gní portada a fin. Inultima ti éra gnüda dada davagnada "a tavolino" ala scuadra da S. Martin.

  

Plaza dl palè a Pidrô

Le sport dl palè ciafâ tres n maiú inte­rès, nia mâ danter la jënt jona mo ince dan­ter plü de vedli. Deache al n'ê degüna posci­bilité da se alenè sön na plaza regolara, êl gnü metü man da jí les domënies dô mëssa fina a Falzes, por soghé partides d'amizizia. Chësta ê sambëgn dër na gran bría y insciö ân tosc ponsè da arjígné tl paîsc na plaza por podëi soghé.

Incër l'ann 1972 él gnü laurè fòra la picia plaza dal palè jö Pidrô, che é stada fina dan da püc’ agn l'unich post, olache an podô soghé al palè chilò La Val, fina che an á spo ciafè tl ann 1993 la plaza dal palè nöia tla zona dl sport "Plans". Por arjigné cá la plaza a Pidrô al orü ester n gran laûr. Denant êl te chësc post le let dl'ega, al cher­sciô aunic’ y al ê n te' mez parü. Mo cun les ores de laûr da pert de tröc volontars che ê gnüs a daidé cun píchel y badí él tosc stè me­so da arjigné ca na bela plaza, che ê scial­di picera y strënta, mo por s'alenè jêra plü co bun assá. Porchël che la cogura ne sciampass nia tres ía t'ega él ince gnü metü sö na sí de grata incër la plaza ía. Sön chë­sta plaza gnêl fat düt isté alenamënt y sam­bëgn ince soghé de vigni sort de partides danter scuadres da La Val.


  

Le campionat dla Val Badia


  

Les scuadres d'aldedaincö á sües raîsc tl campionat dla Val Badia

Le campionat dla Val Badia é gnü or­gani­sé por le prüm iade tl ann 1971 y é jü inant por 16 istá fina l'ann 1986. L'anima dl'organisaziun ê Stachio Erlacher da Lon­gega. Cun süa ligrëza por chësc sport y cun süa dediziun âl metü les fundamëntes dl campionat dla Val Badia y l'á portè inant ann por ann fina ch'al é gnü mostrè sö interès da pert dles scuadres.

 

Scuadres che á tut pert al campionat dla Val Badia y plazamënc’

Scuadra

71

72

73

74

75

76

77

78

79

80

81

82

83

84

85

86

La Ila

1.

 

p.

4.

5.

3.

5.

3.

3.

p.

2

p.

4.

5.

 

 

Longega

2.

 

p.

6.

7.

2.

8.

p.

 

 

p.

p.

 

 

 

 

La Val

p.

 

p.

8.

6.

7.

4.

p.

p.

4.

4.

3.

3.

4.

4.

2.

Al Plan

p.

 

*1.

2.

2.

5.

3.

p.

2.

p.

1.

p.

 

1.

 

 

Rina

p.

 

p.

1.

3.

6.

6.

4.

p.

3.

p.

 

 

 

1.

1.

S. Martin

p.

 

*1.

5.

1.

1.

2.

1.

4.

2.

3.

4.

 

 

 

 

Badia

p.

 

*1.

3.

4.

4.

1.

2.

1.

1.

p.

 

 

 

 

 

S. Ciascian

 

 

p.

 

 

 

 

 

 

 

 

 

 

 

 

 

Corvara

 

 

p.

7.

7.

8.

7.

p.

p.

p.

p.

2.

1.

2.

 

4.

Lungiarü

 

 

 

 

 

 

 

 

 

p.

p.

p.

p.

6.

 

 

Antermëia

 

 

 

 

 

 

 

 

 

 

 

1.

2.

3.

3.

3.

Piculin

 

 

 

 

 

 

 

 

 

 

 

 

 

7.

 

 

Tintal

 

 

 

 

 

 

 

 

 

 

 

 

p.

 

 

 

*    =    Tl 1973 ne n'él nia gnü fat les finales danter les 3 scuadres prümes tlassificades (Badia, S. Martin, Al Plan)

p.   =    Partezipaziun zënza conësce le plazamënt arjunt

             Por i agn 1972, 1985 y 1986 máncel en pert la documentaziun

 


 

L'albo d'or

Badia

4 campionac’
(1973*, 1977, 1979, 1980)

S. Martin

4 campionac’
(1973*, 1975, 1976, 1978)

Al Plan

3 campionac’ (1973*, 1981, 1984)

Rina

3 campionac’ (1974, 1985, 1986)

La Ila

1 campionat (1971)

Antermëia

1 campionat (1982)

Corvara

1 campionat (1983)

 

Le prüm ann âl tut pert 7 scuadres, mo ti agn dô n'en gnêl tres laprò de nöies y ince le livel de jüch gnê da ann a ann miú. Bele dô da dui agn él stè 9 paîsc che s'á lascè scrí íte. La popolarité y l'entusiasm por chësc sport ê chersciüs tla roda de püc’ agn da­spa­vënt snel y ales mius scuadres ne ti ba­stâl nia mâ plü da podëi tó pert al campio­­­nat dla Val Badia. Insciö él tosc stè scua­dres che á ponsè da tó pert al campio­nat pro­vinzial por podëi ince se mosoré cun d'atres scuadres de Südtirol. Metü man á tl ann 1974 la scuadra dl Mareo che ê te chël mo­­mënt dessigü üna dles mius dla valada. Tl ann 1978 él ince stè la scuadra dl'Alta Ba­dia y tl ann 1981 chi da Rina che s'á scrit íte al campionat federal de 3. cate­go­ría. Tl ann 1985 él ciamò gnü laprò la scua­dra da S. Martin. La formaziun de dütes chë­stes scuadres ê na conseguënza dl campio­nat dla Val Badia. Da üna na pert êl dessigü da odëi gion che al lovâ sö chëstes scuadres, mo dal'atra pert gnê insciö l'interès por le campionat dla Val Badia tres mënder fina che le campionat ne n'á nia plü podü gní organisé. Por chë­stes scuadres che sogâ tl campionat federal da merz fina má y spo da setëmber fina mez novëmber, gnê l'ativité massa po­so­cia por tó pert ince ciamò intratan i mëisc da d'isté al campionat dla Val Badia. De chë­stes scuadres fajôl ince pert i mius soga­dus di paîsc incëría, y insciö deventâ le cam­pionat dla Val Badia ti ultims agn na sort de campionat de consolaziun por scua­dres y sogadus che ne sogâ nia a livel provinzial.

 

FIL10280

La scuadra da La Val cun i dui alenadus da Bornech (1975) - impé da man ciampa: i dui alenadus, Albert Sottara, Sepl Sottara, Tone Alton, Rinaldo Ploner, Erwin Frenes, Tino Alton. Cufá: Alfred Comploi, Sepl Frenes, Hubert Agreiter, Giuvani Frenes, Alfred Valentin, Sepl Tavella.

 

La partezipaziun dla scuadra da La Val

  

FIL09165

La scuadra da La Val tl ann 1980 söla plaza dal palè da La Ila - impé da man ciampa: Davide Frenes, Andrè Miribung, Robert Tolpeit, Rinaldo Ploner, Tone Alton, Alfred Comploi. Cufá: Sepl Frenes, Günther Moling, Raimund Campei, Otmar Moling, Giuvani Frenes, Hubert Agreiter. Tl retrat sönsom: Tino Alton (presidënt).

 

La scuadra da La Val á bele tut pert al prüm campionat y á spo partezipé vigni ann, fina ch'al é gnü organisé. Ti prüms agn n'ê i resultac’ nia propi dër bugn, mo por­chël ne se lasciâ i sogadus nia tó la ligrëza. Gnanca la jënt che jê a ciarè prò ne pordô por­chël l'entusiasm. Al é ince stè un n campio­nat, olache la scuadra da La Val á pordü dütes les partides.

Por imparè damí da soghé al palè ân ponsè da chirí valgügn che gniss da fora­decá a tigní i alenamënc’. Tl ann 1975 él gnü tut dui alenadus da Bornech che gnê íte dui iadi al'édema a insigné jö la scuadra. I alenamënc’ gnê fac’ söla plaza da Pidrô y da­trai ince söla plaza dal palè jö Al Plan. I dui alenadus metô dassënn a sgobè i soga­dus y valgügn se baudiâ ince datrai di ale­na­­mënc’ massa dürs.

Mo gnanca chisc sforc ne n'á jovè massa por miorè i resultac’ dla scuadra. Un di maius punc’ debli ê laôta tres le portíer. An se ciafâ tres n grüm de goi y a chësta moda jê tröpes partides pordüdes. Porchël êl gnü pon­sè da "cumprè" n portíer forest por tó pert al campionat. En ocajiun dl campionat dl ann 1977 él gnü tut te porta Oswald Prada da Antermëia, y i resultac’ ê atira gnüs mius. La scuadra s'ê en chël ann pla­zada al 4. post.
Ti agn dô le 1980, che é stá i ultims agn, olache le campionat é gnü organisé, é la scuadra da La Val gnüda tres miú y á des­mo­strè de podëi ince combate por i prüms posc’. La scuadra é gnüda renfor­zada da sogadus jogn, che tolô ince pert prò les scuadres di paîsc vijins al campionat fede­ral o ai campionac’ provinziai di mituns. Ince i sogadus vedli gnê tres plü esperc’ y portâ insciö prò al bun comportamënt dla scuadra. Tl ultim campionat che é gnü orga­nisé, tl ann 1986, á la scuadra da La Val arjunt le miú resultat, concuistan le 2. post.

 

FIL10986

Tl ann 1986, tl ultim campionat dla Val Badia che é gnü organisé, á la scuadra da La Val concuisté le 2. post. Impé da man ciampa: Otmar Moling, Hubert Agreiter, Pio Ploner, Siegfried Miribung, Rinaldo Ploner, Günther Moling, Tino Alton (presidënt). Cufá: Carlo Miribung, Walter Miribung, Christian Videsott, Otto Ploner, Sepl Frenes, Sepl Miribung, Carlo Nagler.