Reuniun generala 2011
L’Uniun Sport Amatoriala á tigni ai 12 de merz süa reuniun generala anuala. Na importanza particolara á la reuniun albü deache al é indo stè da lité le comité nü por i proscimi trëi agn. La reuniun generala é stada na ocajiun por ćiarè zoruch al’ativité dl ann passè y por portè dant le program preodü por l’ann corënt. Le presidënt Alex Alton á danfora saludé i mëmbri che tol pert ala reuniun por passè spo a tratè l’ordin dl dé. Ala fin dl ann passè pò la uniun mostrè sö 160 scrić ite, de chisc é le 40% sot ai 20 agn.
An é spo passá al’aprovaziun dl cunt consuntîf y dl bilanz de previjiun. Tla relaziun söl’ativité à le presidënt y i caposeziuns referí söles ativitês desvalies. La seziun cun la maiú ativité é chëra dl jüch dl palé. Le numer di sogadus che tol pert ai campionać é de passa 50. Chësta seziun á inće les maius spëises, che pò ma gní curides cun l’aiüt di sponsors. Te chësta ocajiun él gnü ringrazié dütes les firmes che sostëgn la Uniun. Ringrazié él inće gnü i alenadus y acumpagnadus dles scuadres di mituns, che rapresentëia le dagní dla Uniun. L’ativité cun i mituns y jogn á porchël le pëis prinzipal tl program dl’uniun. Pro l’ativité dla seziun dl palé él inće gnü recordè ch’al gnará indô organisé le torneo de nöt che rovarà chësc ann ala 13. ediziun. Inće le “viola-camp” por i mituns de düta la valada gnarà indo organisé chësc ann, plü avisa dai 22 ai 27 de agost.
Pro la seziun dla lüsa él stè le caposeziun Helmuth Deiaco ch’á portè dant i punć pinzipai dl’ativité. Al á portè dant i mius plazamënć arjunć chësc ann y l’ann passé dai atleć da La Val. Pro les ativites desvalies él gnü recordè i cursc organisá, a chi ch’al á tut pert passa 200 partezipanć. Dër aprijá é gnüs i cursc por mituns, danter i atri le curs de schi, da nudè y le program sportîf da d’isté. Inće chisc gnará sambëgn indo organisà chësc ann.
Le presidënt à spo presentè la proposta laurada fora dal comité y portada dant al comun por la revalutaziun dla zona dl sport “Plans”. Tl post dla plaza da tenis che ne vëgn nia plü adorada podéssel gnì realisé d’atres strotöres por le tëmp lëde. Insciö podéssel ciafè lerch na palestra da arpizé suracomunala, locai fitness y na palestra por beachvolley y beachsoccer. Al foss inće debojëgn da ingrandì i magazinns y les garages basite. N’atra proposta é chëra de na pista dala liösa por le tëmp lëde cun le travert tla zona sportiva, olach'al podess gnì anuzé les strotöres bele esistëntes.
L’ombolt Franz Complojer é spo te sües parores inće jü ite sön chëstes propostes, les valutan positivamënter. Da odëi sarà sambëgn tan inant ch’ara jarà da ciafè i fianiamënć por les portè inant. L’ombolt à spo ringrazié i funzionars dl’Uniun por le laur che vëgn fat dantadüt por i mituns y jogn. Inće le presidënt á ringrazié l’ombolt por le sostëgn finanziar che vëgn vigni ann conzedü dal comun ala uniun, sides por l’ativité ordinara sciöche inće por i desvalis investimënć che vëgn fać.
L’ultimo punt mo porchël nia le manco important é stada la protlamaziun dl resultat dles lites dl comité, che ará le compit da aministré la uniun por i proscimi trëi agn.
Dô la reuniun á i partecipanć pudü se mangé val e se bere val. Pur ciaré ala prejentaziun clicca le file in injunta.