In dumënia ai 23 de Otober él gnü sughé la otava partida dl campionat 2011/2012 de  3° categoria por La Val. La partida é gnüda sugada fora de ćiasa cuntra la scuadra da Prettau. Na scuadra che é gnüda metüda sö nöia chësc ann y porchël ria da calculè. Mo sciöche an á bel udü tles ultimes partides, ne él degüna scuadra che scinca punti saurisc. 

Dô dales ultimes partides, ulache La Val á coiü adüm püć punć, savô bel i sogadusc dan la partida, che chëstes ultimes 4 partides dl andata mëssl gní fat punć por avëi ćiamò speranzes por i prüms posć. Insciö era ince stada!!!! Ince sce La Val ne á nia mustré en bel jüch essi stá bugn da portè a ćiasa trëi punć.

Dô la buna prestaziun dl ritorno de Copa Provinzia cuntra Gais, é jüs i sogadusc cun na buna convinziun te campo. Mo sciöche bel sté de deplü partides, bel dô da püć  menüć él l'arbiter che scinca en rigora ai aversars. En atacant se porta tl piz dla gran area, Alex ti röia ados, al tira naota demez le pal al atacant y spo cun na spallata sciürel jö le atacant. Le arbiter fischia atira rigore. Insciö se porta Prettau sön le 1 a 0. Mo La Val ne la dá nia sö. Insciö ti garetel en bel gol a Ivan Tschaffert, che á sughé sön la fascia te chësta partida. Sön na bela poniziun röia le pal sön le palo lunch. Ivan röia adalerch in velozité y cun en bel colp de cé sön le prüm palo ne ti lascel degüna oportunité al portier. Insciö nascel le pareggio dô da püć menüć.

La Val prô da impostè la partida, mo al mancia la prezijiun tl prüm tëmp. An vëiga che i sogadusc se stënta en pü da mëter jö le pal y en grüm de pai vëgn suga mal o alć. Mo spo él impo La Val che vá in vantaje. En eurogol de Daniel Frenes. Al ciafa en bel pal da en centrocampist, udon che le portier é en pü massa infora, ne pënsel nia sura dui iadi y tira te porta. Cun en bel tiro dër da lunć él insciö bun da scavalché le portier y le pal röia bel avisa sot la traversa ite. En gran gol de Daniel.

Mo denant che le prüm tëmp se stlüsc jö, sön l'unica dijatenziun di defensursc, se ciafa La Val ćiamò le pareggio. Sön na rimesa jö dal angolo röia la pala cun dui pasaggi ite a mesa l'area. Le atacant dl Prettau é bun da defëne la pala, se oje y spo tra te porta. Sepl ne á degüna chance da abiné le pal. Le prüm tëmp se stlüsc jö sön le 2 a 2.Dô le prüm tëmp él gnü cambié fora Freddy, por en problem a en edl.

Tl secundo tëmp süga La Val indô damí y insciö ti garetel ćiamò dui goi. Le 3 a 2 toma sön en rigore. Ivan se acentrëia ite te area, le portier vëgn fora y le sciüra jö portera, en rigore netiscimo che por fortüna le arbiter vëiga. Ivan se prejentëia sön le rigore y spiazëia le portier. Insciö fejel na bela dopietta Ivan. Le Prettau ne é mai stè plü prigorusc tl secundo tëmp, La Val á la partida tles mans. Le ultimo gol fesc spo Florian. Sön en bel passaggio de Franzi ciafel le pal, cun en bel tiro al volo de esterno  mëtl le pal sön le palo lunch, ulache le portier da Prettau ne pó nia ruvé. Ivan á ince ćiamò la pala por só terzo gol. En bel cros de Micky röia bel al limite dla picera area, ulache Ivan é bel sú, mo so colp de cé röia depüch sura traversa fora. Sottara Stefan röia ince depüch nia al gol, cun dui de bí tiri dal limite che röia depüch dlungia le palo ia.

La partida se stlüsc jö sön le 4 a 2 por La Val.

La formaziun titolara: Kantioler Sepl, Castlunger Marco, Alton Alex, Tavella Jordan, Valentin Elmar, Frenes Daniel, Sottara Freddy, Sottara Stefan, Rubatscher Romeo, Tschaffert Ivan y Rubatscher Florian.

Sostituziuns:

Elzenbaumer Alex por Sottara Freddy

Verginer Franzi por Frenes Daniel

Frenes Micky por Tschaffert Ivan