9° partida camp. 2011/2012 por La Val
In dumënia ai 30 de Otober él gnü sughé la nona partida dl campionat 2011/2012 de 3° categoria por La Val. La partida é gnüda sugada fora de ćiasa cuntra la scuadra nöia in chësc ann da Olang. Scuadra che La Val á bele incuntè le prüm turno de Copa y ulache ai é spo ince passá inant. Dô le bel secundo tëmp dl ultima partida urô La Val proseguí insciö, por portè a ćiasa chisc punti tles ultimes partides dl andata.
Ince te chësta partida á La Val mustrè en buniscimo secundo tëmp y en prüm tëmp nia massa bun, suradüt dal mëter man dla partida.
Bel dô da püć menüć é Olang che se porta in vantaje. Sön na posiziun te campo sbagliada de en defensur da La Val, se infilëia ite en atcant dl Olang sön en bel passaggio filtrante. Al röia cuntra Sepl y spo tirel en bel "piatto" dlungia le palo ite. Na docia frëida por La Val. I jogn sogadusc dl Olang mostra na gran condiziun fisica y en gran pressing. Mo al é ince da capí che ai ne é nia bugn da tigní massâ dî en te ritmo. Porchël La Val ciara da defëne da mëter man y spo atachè sön contropiedi, udon ince che al é rî da combiné, por via dl gran pressing. Insciö nascel ince le 1 a 1 a mesa le prüm tëmp. Frenes Micky ciafa la pala, spo el bun da nun dribbeln un y cun na gran fredëza fejel en bel tiro bas angolé, che röia bel avisa sön le palo lunch. Le portier ne á degüna chance da parè. Püch dedô ti garetel indô a Daniel en beliscimo gol. Sön en en pal che resta fora dl area, röia Daniel la sura, cun en gran tiro al volo mëtl le pal sön le prüm palo dlungia ite. Le portier po ma plü ti ciarè dô al pal. En gran y bel gol de Daniel che porta insicö La Val in vantaje.
Ala fin dl prüm tëmp vëigun bel plan che Olang lascia dô le pressing y ne é nia plü tan lucidi. Insciö é La Val che tol spo la partida tles mans, mo de gran ocajiuns ne nascel impó nia. Le prüm tëmp se stlüsc jö sön le 1 a 2 por La Val. Spo tl secundo tëmp vëigun indô na scuadra da La Val che mostra sciöche ai é bugn da sughé. Cun de beles aziuns é La Val plü iadi prigorusc. Le 1 a 3 é indô Micky che fesc. Sön en bel lancio de Marco jö por la fascia é Daniel che röia cuntra le portier, mo in chësc iade impede trá te porta passel ite a mez, ulache al é Micky bel da sú, insciö mëssel ma plü tra cun en bel piatto te porta. Na bela dopietta de Micky.
Le 1 a 4 é spo Florian che fesc, sön en gran passaggio filtrante de Franzi a mesa düta la difesa fora se porta Florian cuntra le portier. Cun en bel tiro piazè él spo bun da bater le portier. Püch dedô al ćiamó na gran oportunité Florian. Al röia indô cuntra le portier en pü defilé. Chësc iade proel de potënza, mo la pala va sura porta fora. Ivan Tschaffert á ince na buna chance por fa gol. Al é bun cun en per de dribblings da salté deplü defensurs, mo al mumënt dl tiro röiel en pü sbilancé sön la pala y spo röia le tiro sura porta fora.
Romeo Rubatscher stlüsc spo jö la paritda 10 menüć dan la fin. Sön en bel cross de Franzi sön le palo lunch é Romeo che se cordinëia bel y cun en bel colp de testa fejel gol. Le pal scavalchëie le portier (sciöche cun en palonetto) che röia bel avisa dlungia le secundo palo jö en bel gol che stlüsc jö la paritda sön le 1 a 5 por La Val.
La formaziun titolara: Kantioler Sepl, Castlunger Marco, Alton Alex, Tavella Jordan, Valentin Elmar, Frenes Daniel, Sottara Stefan, Rubatscher Romeo, Tschaffert Ivan, Frenes Micky y Rubatscher Florian.
Sostituziuns:
Nagler Max por Sottara Stefan
Por udëi i atri resultać drüca (ince di atri campionać ulache sogadusc da La Val süga para) drüca: resultać