7ª partida campionat 2013/14
In dumënia ai 13 de otober él gnü sughé la setima partida de campionat de 3ª categoria por la scuadra da La Val. La partida é gnüda sugada fora de ćiasa cuntra la scuadra da Gais.
Te chësta trasferta, sön le rî ciamp da Gais é i sogadus da La Val bogn de portè a ćiasa 3 punć asuià, cuntra na buna scuadra che à lascè udëi sües qualites, dandadöt tl prüm tëmp, daulache la scuadra de Floriani à stentè a rové te partida.
Sciöche bel dit é la scuadra da Gais che detëia i ritmi tl prüm tëmp. I sogadus da La Val se stënta da sughé le pal y sbaglia n gröm de pasaji, ala scuadra ti mancel l'agresivité che ai à desmostrè tles ultimes partides.Tröp druch vëgn fat dales perts jö, daulache i sogadus da Gais é plü gunot bogn da se trà ite cuntra area y jì cuntra porta.
A mez le prüm tëmp tomel spo le gol por la scuadra aversara. Sön n lancio lunch dala fascia cuntra le portier éle Sepl che pro de se apié le pal mo la cogura ti sciampa fora dles mans y n atacant aversar à ma plö bria de tra te porta. La scuadra da La Val ne à döt le pröm tëmp nia albü na gran ocajiun da gol.
Le arbiter sciüra la palsa sön le resultat de 1 a 0 por l' Gais.
Tl secundo tëmp é spo la partida che tol n'atra strada, al é i sogadus da La Val che mët man de lascè udëi sò jüch. A ciarié sö i sogadus é stades les parores dl' alenadù Floriani te spogliatoio. La scuadra da Gais ne é nia plü buna de restè cörta y compata sön les ripartenze di sogadus da La Val y insciö éle i atacanć bogn de tignì le pal alt a fa alzé döta la scuadra. Le sogadù da La Val Marco Rossini vëgn metü jö te area aversaria mo al indemo éle l'arbiter che ti mostra la cherta ghela, al à odü na simulaziun che foss stè n fallo tlêr. Al ne passa nia tröp tëmp che al toma le gol dla parité por La Val. Te na mischia amesa l'area éle n defensur aversar che fej fallo sön Alex A., le arbiter sciüra atira le önescmetri. L'atacant Emanuel D. se prejënta dan le portier y siglëia l' 1 a 1.
I sogadus ciafa insciö plö coraje y crëi tla devënta. Püch dô éle ciamò l'indemo Emanuel che ciafa n bel lancio da na pert ite, le pal abiné de cé pasa fora düta la linea de porta mo degun atacant röia lassura.
Al vëgn combatü inant sön vigni pal y la luzidité di sogadus ne lascia nianca do n püch, insciö ti garetl spo le gol dl 2 a 1 a Micky. Sön na combinaziun cun Marco C. éle Stefan che cambia pert cun n lancio; Micky che jô dal atra pert jö cuntra porta é bun dl mët jö y cun n tiro bas batel le portier. N bel gol che fej alisiré n pü la tenjiun te ćiamp.
Al ne passa nia tröc menüć che Marco Rossini vëgn espulso por dopla amoniziun sön n fallo te area aversara. A chësta moda é le Gais che rischiëia n pü y devënta plö offensiv y mët la scuadra da La Val sot a presciun. Le gran laur defensiv da pert de düta la scuadra che combat cina ala fin por defënn le resultat y che ne fej nia ji te porta i aversars ti garantësc insciö la devënta a La Val.
La partida se stlüj jö sön le 2 a 1 por la scuadra da La Val. 3 punć dër importanć fora de ćiasa por la scuadra sce an ciara l'andamënt dl campionat. La Val resta al secundo post de tlassifica do le Rina.
Proscima partida é in dumënia ai 20 de otober dales 15:30 te ćiasa cuntra le Mühlwald.
Formaziun titolara: Sepl Kantioler, Werner Sottara, Alex Alton, Paolo Vallazza, Marco Castlunger, Alex Elzenbaumer, Stefan Sottara, Romeo Rubatscher, Marco Rossini, Micky Frenes y Emanuel Dorigo
Sostituziuns:
Werner Sottara por Elmar Valentin
Micky Frenes por Manuel Stampfer
Alex Elzenbaumer por Alexander Miribung
Por udëi i resultać de chësta dumënia de campionat drüca: risultati.pdf
Do la devënta de copa, chësc ultim mercui ai 11/09 cuntra le Aicha, é la scuadra da La Val buna de purtè a ćiasa 3 punc importanc. Na partida dër sintida, suradüt por l'alenadù Floriani che à alenè la scuadra dl Niederdorf por 2 agn.
I sogadusc da La Val röia sön le ćiamp cun na gran grinta y bele do da püc menüc tomel le gol dl 1 a 0. Sön n angolo éle Alex E. che ciafa le pal al limit dl' area y cun na bela trata sot la traversa portel la scuadra da La Val in vantaje.
A mëz le prüm tëmp éle Emanuel bun de radopié le resultat, sön n assist de Alexander éle bun de se controlè le pal, cun na gran finta ti sciampel al defensur aversar y cun na trata basa batel le portier.
I atacanć da La Val é bugn de tignì sö le pal y cun de beles combinaziuns esi bugn de ti sciampè plü iadi ala defenjiun aversara, mo sënza ester bugn de ji a conclujiun.
Püch dedo éle ciamò Micky che à na gran ocajiun, sön n bel preparativ röiel te area al dër mumënt, mo le tiro röia de püch sura porta fora.
Dan che le arbiter sciüra le prüm tëmp éle ciamò n atacant dl Niederdorf che abina de cé la stangia de porta sön na trata dal angolo.
Le prüm tëmp se stlüj jö sön le resultat de 2 a 0 por La Val.
Le secundo tëmp mët man cun n gran druch da pert dl Niederdorf, i sogadusc da La Val se stüda ia y se lascia fracé dala scuadra aversara.
Cun de beles aziuns röia la scuadra aversara deplü iadi dan porta y i sogadusc da La Val mëss aretrè y se parè cun dötes les forzes. Cun le gran assedio da pert dl Niederdorf garetl tosc le gol dl 2 a 1.
Sön n lancio éle dui defensurs che ne se capësc nia y röia a saltè adüm sön le pal che vëgn insciö spizoré y ti röia bel avisa al atacant aversar che cun n tiro bas é bun de bat le portier da La Val.
La nervosité crësc y la lucidité da do, i sogadusc mëss purvè a düc i cosć da defëne le resultat. Cun le gran laur de Emanuel che và a recuperè n grüm de pai sciurà demez y tëgn insciö sö le pal por che la scuadra pois se arlungé, ti garetl la dopietta al 82ˆ.
Sön n cross da na pert éle bun de se mët jö le pal de piet y cun na bela trata de ciamp sön le palo lunch siglëiel le resultat dl 3 a 1.
Al mancia ma plü püc menüc ala fin y i sogadusc da La Val stà plö defensiv por defënn le resultat.
Püch dedo él le arbiter che sciüra la fin. La partida se röia sön le resultat de 3 a 1 por La Val.
Cun chisc 3 punc davagnà se porta La Val al 3º post de tlassamënt.