In dumënia ai 27 de aurì él gnü sughé la sesta partida de campionat de 3a categoria por la scuadra da La Val. L'aversar é in chësta dumënia stè le Olang, che à fat jì i sogadûs da La Val a mans ötes a ćiasa. Le Olang dominëia sön sò ćiamp davagnan por 2 a 0.

 

 

 

Do la semifinala de Copa Provinzia da in mercui, daulache le Ritten é jü demez dal ćiamp da La Val cun la devënta de 2 a 0, mëss la scuadra de Floriani subì le medemo resultat sön le ćiamp da Olang. La prestaziun dla scuadra ne é nia stada assà buna sciöche atres partides, ince magari deache les 4 partides sugades tles ultimes döes edmes se à fat sintì tles giames di sogadûs.

Passun ala partida, bele da mët man é le Olang che fej n gran druch cun de beles aziuns y n bel jüch. I sogadûs da La Val é fracià massa zeruch y insciö pò i aversars atira concuisté le pal y sughé. Freddy mëss bel dô püć menüć abandonè le ciamp a gauja de na strata, chësc vëgn sostituì cun Felix N. La Val röia ma püć iadi sö dan porta aversara, un n iade cun Emanuel D., che ciafa le pal sön na pêrt dl'area, al é bun da se ôsc y cun na bela trata sfiorëiel le palo lunch de porta. Sepl K., indô tra i pali fej ince na gran parada, sön na trata dal ciantun abina n atacant le pal de cé y chësc vëgn devié dal portier.

La conzentraziun fala cotan y i pröms caranta menüć ne é la scuadra da La Val nia buna a se sblochè. Apëna che i sogadûs ciafa indô n pü de grinta é l'arbiter che sciüra le pröm tëmp.

I sogadûs pò jì a recuperè energies dô n burt pröm tëmp, le resultat resta sön le 0 a 0.

A Emanuel D. ne ti vara nia cîs bun y mëss insciö gnì sostituì, te ćiamp röia spo Adrian M. che süga bel dant. A mët man dl secundo tëmp ciafa i sogadûs da La Val plö coraje y é bugn de alzè la scuadra, por n mumënt é le Olang che mëss se dëfenn. Sön na trata dal limit dl'area é Micky che abina le palo lunch, chësta trata vëgn deviada dal portier, Felix röia ciamò sön le pal mo la trata cuntra porta röia de püch dlungia ia.

Püch dô é spo le Olang che sun aprofitëia, i sogadûs da La Val é fora de posiziun y insciö é l'atacant che ti sciampa ala defenjiun. N defensur pro dal tignì sö mo le contrast ti costa la chêrta cöcena por avëi gaujè le fal sciöche ultimo uomo. Ince sce la bela trata al limit dl'area vëgn deviada da Sepl K., röia l'aversar lassura, chësc pâssa amez daulache sò cumpagn pò apogè le pal te porta. I sogadûs ne arbâsa nia le cé y pro de atachè le plö che ara và, ruvan ince ciamò cun na pala de cé de Adrian cuntra porta, gnüda rebatüda sura fora. Le defensur desgord y le vantaje di aversars ó ince dì rischié val y porchël é ince le Olang che prô da ataché la profondité. Sön le secundo gol esi in trëi cuntra un che ataca la porta, le defensur ne é nia bun dai tignì sö y la trata dlungia le palo ite ne é nia jüda da tignì sö por Sepl. A püć menüć dala fin ti à chësc gol taié les giames ala scuadra.

Ti atri menüć dla partida ne éle nia gran ocajiuns da trames pêrts. La partida se stlüj jö sön le 2 a 0.

Na batosta por la scuadra da La Val che resta insciö al secundo post dla tlassifica cun 40 punć.

La proscima partida de campionat é in dumënia ai 4 de aurì dales 16:00 sön le ćiamp a La Val cuntra le Gais. Le proscimo mercui ai 7 de mà él le ritorno dla semifinala de Copa sön le program. Sughé vëgnel dales 20:00 sön le ćiamp dl Ritten.

 

Formaziun titolara: Sepl Kantioler, Egon Frenes, Alex Alton, Paolo Vallazza, Werner Sottara, Alex Elzenbaumer, Stefan Sottara, Freddy Sottara, Micky Frenes, Marco Rossini y Emanuel Dorigo.

Alenadù: Floriani Claudio