Na gran reaziun dla formaziun da La Val sön le ćiamp a Raas, i atacanć ladins fej balè cinch iadi la rëi aversara y condüj a ćiasa i trëi punć

 

 

Le pröm post surandè tla penultima partida ala scuadra dl Gais à dessigü lascè le sëgn mo inće inieté nöies forzes y na gran determinaziun a davagné zeruch i punć pordüs. Sön le ćiamp dl Raas, cun na temperatöra ideala por sughé al palê, é gnüda la partida dominada dai ghesć ladins, suradöt tl secundo tëmp.

Dal mëteman é i śogadus da La Val posizionà cun n modul plö ofensif y bel ti prüms menüć gareta le pröm gol. Alexander M. condüj le palê de piet amesa trëi defensurs fora y cun na trata sëcia al jore tl piz bas de porta batel le portier. Inće sce le modul chirì fora da Floriani à portè atira sü früć, é i śogadus da Raas intrês sûsc amesa les linies y i śogadus a mezćiamp ne pordüj nia da ruvé al antizip. Insciö la dezijiun de passè a en modul plö ecuilibré. Le atacant Alexander M. po’ püch do mostrè sö na doplëta te chësta partida: Al 30^ se presentëia chësc sù dan le portier y fej balè la rëi cun na trata basa sön le pé ciamp de porta. La defenjiun ladina ne à plö co intant nia msè se stancé, val cogura prigorosa è gnüda architada sö a dërt’ora, denant che ara ruvass ai atacanć aversars.

Le pröm temp se röia sön le resultat de 2 a 0 por La Val.

La secunda fraziun é scialdi por düt le tëmp tles mans dla scuadra de Floriani, le mezćiamp se fej scariché le palê dai atacanć y le partësc fora ales fasces por Michi y Alex E. che fej tramorè le mür defensif da Raas. Alex E. vëgn sorvì cun n palê arlungé da pert dl compagn Michi, de piet le mëtel a tera y se chir le trù cuntra porta, la trata basa tl piz ciamp é fatala por le verdaporta.

N ater protagonist che pò mostrè sö süa secunda doplëta te chësc campionat é Michi Frenes, autur di ultims dui goi de chësta partida. Sön na passaja filtranta de Max N. al 55^ fej Michi inciurnì le defensur sön le piz de area, al prô spo na trata sëćia de ciamp che ti gareta, indirizada sot la stangia de porta. N gran gol che ti porta plö sigurtè a düta la scuadra. Diesc menüć dô castighëia ćiamò le medemo Michi, in chësc iade se chir l’atacant bel sù le trù cuntra porta y bat le verdaporta cun na trata de prezijiun sön le pé lunch. I atacanć da Raas é impò bugn de rové val iade dan porta, ince a contlujiun, mo Julian blochëia scialdi dütes les cogures. Prigorosa é la puniziun dl Raas al 75^ che rebat sön la stangia de porta.

L’ocajiun por le sesto gol é ćiamò Michi che à sön le pé, la passaja alta de Stefan le porta su dan le portier, mo por desfortüna rebat le palonët de Michi sön pé de porta. D’atres ocajiuns da gol ess ćiamò podü gnì alzades fora, a gauja de dijatenziuns vëgn i atacanć ladins gonot abinà sön le fì dl forajüch. Dan le sciüre dla fin fej ćiamò le atacant da Raas tromorè la scuadra y le publich ladin, sön na crossada abina chësc le palê de će cuntra porta, le verdaporta Julian deloj le palê cun na gran parada a dërt’ora te ciantun.

 

Formaziun La Val: 1. Julian Moling, 2. Elmar Valentin, 3. Marco Castlunger, 4. Paolo Vallazza, 5. Egon Frenes, 6. Freddy Sottara, 7. Max Nagler, 8. Stefan Sottara – capitan, 9. Alexander Miribung, 10. Michi Frenes, 11. Alex Elzenbaumer

Alenadù: Claudio Floriani

Proscima partida: En domënia dales 14.30 a La Val cuntra le Sest.