Partida de retüda Copa Provinzia - Niederdorf

Stampa

copa2012

In sabeda ai 15 de novëmber él gnü sughé la partida de retüda de Copa Provinzia sön le ćiamp a Niederdorf cuntra la scuadra de ćiasa. Devënta tlera por le Niederdorf, che à la miù sön la formaziun ladina por 3 a 0.

 


 



Do la devënta por 2 a 1 al'andata, se presentëia i ghesć ladins cun trö massa pücia convinziun a passè le turno a Niederdorf. Dandadüt le pröm tëmp é da desmentié, cun l’ asënza de agressivité y tröc iadi fora de posiziun, daulach i aversars à plö iadi anuzé le dërt mumënt por jì cuntra porta. Le gol toma do 20 menüć, sön na trata dal ciantun deviëia le defensur ladin le pal te süa porta, le portier Julian pro ćiamò de la trà demez mo abina le pé de porta, la cogora röia spo te rëi por le 1-0. Püces é les ocajiuns da recordè por La Val, la scuadra jona mëss se sotmët al jüch aversar, dandadüt a mezćiamp. Al sciür dla palsa él Floriani che mëss sostituì 3 śogadùs a gauja de s'avëi fat me.

Tl secundo tëmp é la determinaziun indo sön le ćiamp. I ladins ne se fej nia plö pressè y se alza, inće cun val bela contlujiun te porta. Te n iade spo na ripartënza aversara, le atacant i passa le palê al limit dl'area al cumpagn, cun na bela trata de prezijiun sighlëia chësc le radopl por le Niederdorf. Le terzo y ultim gol toma atira dedo, te n gran cajin amez area, vëgn le atacant da Niederdorf metü a tera dala defenjiun ladina, le önescmetri ne vëgn nia metü in descusciun. Le capitan trasformëia le önescmetri y mët le resultat al sigü. I atacanć les pro ćiamò cun vigni meso de arjun le gol, mo decuntra é ince le arbiter, che naota lascia proseguì le jüch sön fai evidënć y plö tert ti mostrel la cherta cöcena a Michi y Marco por protesta, le nervosism di
śogadus é stè chilò de colpa. Le alenadù Floriani mëss inće lascè le ćiamp da jüch. Ma plö püc menüć dala fin y nia ne và plö da trà fora, i śogadus lascia le ćiamp batüs y mëss ti surandè le pasaje dl turno ai aversars. La Val va sëgn tla palsa lungia da d'invern y metarà spo indo man de furà cun la preparaziun al campionat.


Niederdorf - La Val : 3-0


Formaziun La Val: 1. Julian Moling, 2. Martin Ploner , 3. Luca Pescollderungg, 4. Paolo Vallazza, 5. Marco Castlunger, 6. Stefan Sottara – capitan, 7. Felix Nagler, 8. Michi Frenes, 9. Adrian Miribung, 10.Marco Sottara, 11. Alex Elzenbaumer

 


Sostituziuns:

Egon Frenes gnü ite imped Martin Ploner (45^ menüt)

Alexander Miribung gnü ite imped Adrian Miribung (45^ menüt)

Max Nagler gnü ite imped Felix Nagler (45^ menüt)

Andreas Miribung gnü ite imped Luca Pescollderungg (70^ menüt)


Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.