Sön le ciamp strënt da Dietenheim à la scuadra da La Val la miú sön i padruns de ciasa por 2 a 0. Ai 9 de setëmber la partida de retüda de Copa Provinzia a La Val.

 

 

 

Cun na scuadra jona y plëna de determinaziun pëia ia la terza sajun dl palé adüm al’alenadù Floriani Claudio. Sciöche vigni ann é la prüma partida ofiziala chëra de Copa Provinzia. In chësc ann ti toca a La Val le Dienteheim, scuadra tomada jö dala secunda categoria y bel ciarciada te n’ amichevole a mez agost. En domisdé cun temperatüres scialdi cialdes ti á dé le begnodü sön le ciamp a Dienteheim a la scuadra ladina, na partida ecuilibrada fina amez le secundo tëmp, olache i ghesc fej gran druch y va tosc in vantaje.

A gauja dl ciamp plö strënt, pro i ladins de pié ia cun en modul plö offensif, cun l’injunta de n atacant. Val aziun lapró gareta ince, Stefan vëgn sorví da Luca da na pert jö y mët le palé amez por le sogadú nü Franz Tolpeit, al é bun de controlé le palé mo ne röia por püch nia a contlujiun. Tosc vëgn  i sogadus ladins drucá jö dai aversars, che röia ince a rebat cuntra porta, le portier Julian M. fej bun só laûr y deviëia scialdi. Le alenadú Floriani, che mëss seguí la partida dafora dal ciamp, a gauja de na desgorta, mëss tosc passé a n modul classic por evité inant la presciun aversara. Impó ne ti gareta n bel jüch bâs ai ladins, a mezciamp röia i pustri denant sön le palé y pó de insciö continuité al jüch y n gran sostëgn a sü atacanc. Dan le pröm tëmp é ciamó Alex E. che da jö na passaja filtranta a Max Nagler, chësc ultim abina le palé massa tert y ne sciafia nia da tra cuntra porta.

Le pröm tëmp se röia sön le pêr por 0 a 0.

Le secundo tëmp se fej plö interessant, deplö pai vëgn recuperá bel a mezciamp y sugá fora sön les perts. I movimënc di atacanc ladins al momënt iüst é otimai por ti sciampé ala defenjiun aversara. Le portier mëss plö gunot se strá por desfanté les trates dalunc. Les dezijiuns arbitrales, nia tres iüstes y influenzades dai scrai dl publich, fej pié ia n gran marcé y nervosism te ciamp, insciö ti sciampa ince bel plan le control dla partida fora dles mans al arbiter. Insciö mëss tosc lascé n sogadú aversar le ciamp por dopla amoniziun.

Al 75^ pënsa spo Alex E. a deslié le grop, al vëgn sorví dal mezciamp y sön le piz de aria prol la trata alta a giré sön le secundo pé de porta, chësta ti gareta y la strata dl verdaporta ne é plö por nia. Dô avëi ejaurí prësc les forzes dal gran cialt, ciafá la scuadra sëgn na nöia ciaria de determinaziun. Al ne passa tröp che le medemo atacant realisëia süa dopleta, sön na incomprenjiun dla defenjiun abina Alex denant le palé y pó jí sú cuntra le portier, al vega la trata bassa che röia de püch dlungia le pé de porta ite por le 2 a 0 al 85^.
I ultims cinch menüc de jüch mëss e ladins se paré dala presciun aversara, le aiüt dl portier Julian é chilò fondamental. Le sciür dl arbiter fej spo ruvé la partida. Na devënta miritada purmó tl secundo tëmp, i sogadus se ciaria insciö de determinaziun por le scomenciamënt dl campionat de chësc proscim fin dl’edema.

Dienteheim – La Val : 0-2

Formaziun La Val: 1. Julian Moling, 2. Luca Pescollderung, 3. Egon Frenes (dal 60^ David Moling), 4. Paolo Vallazza, 5. Werner Sottara, 6. Freddy Sottara, 7. Christian Dapoz (dal 45^ Alexander Miribung), 8. Max Nagler (dal 75^ Felix Nagler), 9. Franz Tolpeit (dal 45^ Adrian Miribung),10. Stefan Sottara - capitan, 11. Alex Elzenbaumer

Gol por La Val: Alex Elzenbaumer (al 75^ y al 85^)

Proscimes partides:

In dumënia süga La Val süa prüma partida de campionat a La Val, dales 16:00.

La partida de retüda de Copa Provinzia cuntra le Dietenheim vëgn sugada ai 09 de setëmber te ciasa dales 20:00