Sot n sorëdl lorënt él gnü sughé a La Val la pröma de campionat. Le aversar é le Prettau, che á messü sun jí a ciasa a mans ötes.

Le pröm vare te chësta sajun é garaté, ince sce nia saurí por le gran cialt, mo i sogadus da La Val é bugn de partí sö bun les forzes sön i nonanta menüc de jüch y de castighé l’aversar al dërt mumënt. Dui di trëi goi toma tl pröm tëmp, Alexander stlüj spo jö la partida tla secunda fraziun cun n bel gol.

Le grup dl palé da La Val se prejentëia te chësta nöia sajun cun en bel numer de sogadus, jogn y cun na gran motivaziun. Chësc é ince bel gnü desmustré tla pröma de campionat, ulache val sogadú nü á bel podü ciarcé le ciamp.

Jun de revêrs, dal scomanciamënt é le Prettau che tôl la partida tles mans, i pasaji dla formaziun ladina röia massa gunot ai aversars, chisc é bugn denant a lì i movimënć y insciö ti gareta n gröm de ripartënzes. I atacanc ne röia indere nia daimpró a porta. Fora de n sarëgn é spo le atacant ladin Alexander che desliëia le grop cun en gran stach de cé. Sön n palé arlungé dal portier Sepl antizipëia le sogadú le defensur aversar y abina le curan cun le cé por en palonët sura le portier fora. Le gol scinca nöia forza ai padruns de ciasa, che se descëda y mët man da fa só jüch. Al ne passa nia trëi menüc che Alex abina bel le radopl cun na gran trata sön puniziun dal piz de aria a giré sön le prüm pé de porta, a se strá por paré ne purdüj chiló le portier nia. Atres döes ocajiuns dan le pröm tëmp é ciamó da alzé fora por Alexander, sön na pasaja filtranta de Alex ne röia le atacant por en pulan y apogé le curan te sach, ala secunda é sogadú a mezciamp Freddy che crossëia le palé amez por le medemo Alexander, chësc taia amesa la defenjiun y apogëia al jore te porta. Le mandl fosch se vëiga en forajüch, daldöt inesistënt.

Le pröm tëmp se stlüj jö sön le 2 a 0 por La Val

I pîsc lorënc pó jí a palsé, mo tosc tochera indô se prejenté por la secunda pêrt. Le Prettau, sciöche tla pröma fraziun, mët man cun gran druch. I sogadus de ciasa se lascia dassënn druché zeruch, sforzá spo cun vigni meso a tigní sö i atacanc tres in movimënt. Le arbiter partësc fora a chësta manira ince val amoniziun.

Al 66^ vëgn Alexander sorví dal mezciamp, ala destanza de trënta metri da porta se archita le mandl y ciara ala posiziun dl portier cotan fora de süa porta, sënza sighité vêghel na trata sëcia sot la stangia de porta. Na bela sodefaziun por le sogadú, che pëia ia tla sajun cun na doplëta. Cun le passé di menüc é ince le bel jüch da trames perts che calëia, le cialt ti tôl les forzes y la luzidité ai sogadus. Por La Val ó di chësc tigní la posiziun y resté compac por fa frunt a les ultims ripartënzes dl Prettau. Cossa che ti gareta ince y i prüms trëi punc resta insciö a La Val. (ss)

La Val - Prettau  3-0

Formaziun d La Val: 1. Sepl Kantioler, 2. Luca Pescollderungg (dal 77^ Martin Ploner), 3. Marco Castlunger, 4. Paolo Vallazza, 5. Werner Sottara, 6. Freddy Sottara, 7. Christian Dapoz (dal 64^ Felix Nagler), 8. Stefan Sottara – capitan, 9. Adrian Miribung (dal 75^ Franz Tolpeit), 10. Alex Elzenbaumer, 11. Alexander Miribung (dal 77^ Egon Frenes),

Alenadù: Claudio Floriani

Goi por La Val: Alexander Miribung (al 24^ y 66^), Alex Elzenbaumer (26^)

Proscima partida: en sabeda dales 16.00 a Niederdorf cuntra la scuadra de ciasa