3ª partida de campionat - Dietenheim

Stampa
3a_categoria

La Val passa le rode de Copa Provinzia cuntra le Dietenheim mo mëss ti lascé i trëi punc de campionat.


 

 
L'ultima edema é la scuadra dl Dietenheim rovada dui iadi a La Val, le mercui sëra por la Copa Provinzia y la domënia por la terza de campionat. Do avëi batü i pustri al'andata de Copa Provinzia por 2 a 0 ti á basté ai ladins a tigní le pêr de 1 a 1  por passé le rode.
Plö mal era jüda la domënia de campionat, ulach La Val ne purdüj nia plö a recuperé le svantaje dô na puniziun de prezijiun de Mair dl Dietenheim.

Trames scuadres ne á nia pité n bel jüch, le palê nia gestí dërt y scialdi por aria ne dëida nia a costruì aziuns concretes. Al 15^ vëgn Alex E. delizié cun na crossada alta, al pro la trata al jore cuntra porta mo le curan tol n'atra direziun y röia dlungia porta ia. Ala mesora é i sogadus dals perts dl Dietenheim che fej tramuré le mür ladin, ai ti sciampa plö gonot ala defensciun y röia al preparatif por i cumpagns amez. Nia da dì por la direziun dla partida da pert dl'arbiter jonn, a ezeziun dl jüch tröc iadi archité inutilmënter. Dan le sciür dl pröm tëmp se fej lerch Alex al limit y vega na trata debla te porta, le verdaporta ne mëss nia se sposté a tignì sö le palê.


Le pröm temp se stlüj jö sön le resultat de 0 a 0


I padruns de ciasa scomëncia le secundo tëmp cun l'intenziun de sbloché atira le resultat. Bel plan vëgn le curan tigní a tera y  aziuns gareta, ruvé a contlujiun indere ne ó nia ciamó ester. Sön n bun momënt por La Val conzed l'arbiter na puniziun al limit dl'area ladina por n constrat sön l'atacant aversar. A se prejenté al limit é le sogadú Mair Thomas che musüra bun la trata y indirizëia le palê sura le mür fora avisa tl'incrujiada de porta. Le Dietenheim se porta insciö in vantaje y por La Val se mëtera mal. Le alenadú Floriani fej val variaziun al modul de jüch, l'inserimënt de n atacant inplö fej pié ia na presciun nia da püch dla scuadra. Al 75^ é Max che vëgn sorvì sön la pert ciampa, al se chir le trú plö cürt cuntra porta y vega la trata de ciamp, chësta ti fej le pulan al pé de porta. Le palé vegn scialdi trat ia y ca al limit de area aversara, mo ne ó nia ruvé te rëi. Cun vigni meso pro La Val ciamó i ultims menüc a avalié le resultat, mo mëss zede al sciür dla fin.


La Val - Dietenheim: 0-1

Formaziun La Val: 1. Sepl Kantioler, 2. Werner Sottara, 3. Marco Castlunger , 4. Paolo Vallazza, 5. David Moling , 6. Freddy Sottara, 7. Max Nagler, 8. Stefan Sottara - capitan, 9. Adrian Miribung (dal 65^ Franz Tolpeit),10. Alex Elzenbaumer, 11. Alexander Miribung (dal 75^ Christian Dapoz)

Proscima partida: in sabeda süga La Val süa cuarta partida de campionat a Percha dales 16:00 cuntra la scuadra de ciasa

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.