Chësta ultima dumënia ai 13.03.2016 él gnü organisé da pêrt dl' Uniun dl Sport Amatoriala da La Val na gara de schi alpinism in record de Alexander Ellecosta y Manuel Moling sön Armentara.

 

 

 

Adüm al Memorial por Alexander Ellecosta, ruvé bel a süa cuarta ediziun, él gnü organisé ince na gara dla lüsa, por recordé le jogn atlet Manuel Moling, che ne s’à lascé dan da n’ann. Tratan che i atlec ê sön trù cun i schi da tourn por la gara tradizionala da Spëscia cina sön Armentara, ê i atlec dla lüsa che se mosorâ sön la bela pista sot la ütia „Ranch da André“, arjignada ca dala seziun lüsa cun l aiüt dl giat.

Al start dales 10:00 ite a Spescia se él prejentè plö o manco 20 partezipanć, da chi plö determinà a fà le miù tëmp, a chi che à orü se lascè plö dlaurela y se gode le bel paesaje. Laprò ince na categoria da jì a pé, por chi che á urü slat ó plö cun calma. Le trù dla gara é plö o manco resté chël di agn denant, cun le start sura Spescia y le travert sö dala ütia “Ranch da André” sön Armentara, daulache dô da 40 menüc é spizurá i atlec plö asvelc. Le miú tëmp dl dé é gnü arjunt da Pescollderung Albert de Badia, che pó mostré sö le tëmp de 39’35.88. Laprò él ince gnü premié le tëmp ideal che ti va in chësc ann a Moling Armin da Longiarü che cun só tëmp de 53’29.90 ti é ruvé plö dlungia (tëmp ideal: 53’33.26).

La novité da chësc ann é sambëgn stada la gara dla lüsa tignida nia massa dalunc dla traverd di schi. Grana é stada la partezipaziun, cun 28 atlec al start. Düc i atlec à podü porvé fora daimprüma la pista, por se studié jö les ôtes strëntes y ciafé confidënza. Püch dô era spo piada ia, düc i atlec à garejé te döes manche. Ala fin cun la soma di tëmps él gnü premié le miú: David Moling fej le tëmp de 34.98 y se aiudichëia insciö le pröm post. Pro les ëres él Brunner Shamir che ti l’astica a dütes cun le tëmp de 37.68. Ince pro chësta competiziun él gnü premié le tëmp ideal, che vëgn surandé a Miribung Martin cun le tëmp de 51.15 (tëmp ideal:51.02)

Bel plan é ince spo les mëses pro ütia che se é implides de jënt, ruvada adalerch da deplö paîsc dla Val Badia. Canche düć é rovà sö y s' à metü jö pro mësa, él gnü tignì la Santa Mëssa da Siur Franz Sottara, abelida dal cor SYN da La Val, a chisc n rengraziamënt particular. Dedô él spo stè vigni atlet che à ciafè val da mangé y da bëre y dales 14:00 ti él gnü surandè da pêrt dl presidënt Alex Alton, Diego Tschaffert, Toni Ellecosta y Otmar Moling i pesć ai atleć por i miûs tëmps. Ala fin dla premiaziun ti él ćiamò gnü surandé na picera recordanza ala familia Ellecosta y ala familia Moling.

Ringraziè uressun düć chi che à daidé organisé l’ evënt y düc chi che é gnüs adalerch por stè adüm y a insciö daidé abelì la festa.

 

Por odëi düc i resultac dla gara de schi da tourn: tlassifica gara schi

Por odëi resultac dla gara dla lüsa: tlassifica gara lüsa