Do na partida rica de ocajiuns por La Val, mëss i aversars da Perca sun jì derevers a ciasa senza punc, che ti resta ala formaziun ladina.

Le Perca s’à presenté l’ultima dumënia a La Val por chirí la devënta y recuperé insciö la posiziun de tlassifica sön i ladins, atualmënter al secundo post. Chësc obietif ne ti é indere nia garaté, la formaziun da La Val é plö sterscia y mostra n progres tl jüch respet a les ultimes partides. Do dui goi che toma bel tl pröm tëmp segnëia ciamó Paolo Vallazza le terzo, ala fin vëgn ciamó metü le resultat al prigo do n önescmetri conzedü al Perca.

La partida mët man cun val menüt de retard a gauja dl’arbiter ruvé adalerch tardí. Atira é le Perca che mët sot druch i padruns de ciasa, ruvan ince a trá cuntra porta. Bele püc menüc plö tert vëgn le resultat deslié cun na bela aziun; Alex E. se fej trú da na pert y mët amez n bel preparatif por Werner che a püc metri dan porta arlungëia ciamó sön Marco S., chësc ultim á ma plö bria de apogé le palé te porta por le 1 a 0. Ti proscims vint menüc dominëia La Val le mezciamp aversar, deplö ocajiuns cuntra porta gareta: al 15^ vëgn Alex. E. sorví sön le cinch te area, al passa zeruch por Freddy che röia cun sbunf da ia dô, la trata massa debla vëgn rebatüda y röia a Adrian che pro ciamó n iade, sënza abiné indere la porta. Püch dô vëgn Max N. sorví cun na crossada lungia da pert de Luca P., al prô de spizuré de ce mo ince chësta ne ó nia ruvé te sach. Le radopl dl resultat röia al 40^ menüt pro na puniziun cunzedüda al limit dl’area, Alex se presentëia ala trata y la fej ruvé de prezijiun tl’incrujiada de porta. Dan le pröm tëmp él ciamó da alzé fora na gran aziun piada ia dal defensur Werner che recuperëia le palé a mezciamp y taia fora la defenjiun cun na passaja filtranta por Alex, chësc la condüj jö insom al ciamp y preparëia alt amez, le palé inderizé cuntra porta rebat tla stangia, le portier é asvelt y la fej süa te n secundo mumënt. Ocajiuns prigoroses por le Perca ne él nia da alzé fora.

Le pröm temp se rüva sön le resultat de 2 a 0 por La Val.

La determinaziun portada te ciamp dal mëteman dla secunda pert se fej bel udëi dô püc menüc. Sön na trata dal ciantun ti röia le palé avisa sön le pé al defensur Paolo V. che vëgn lascé sú dan le portier, la trata bassa basta por fa ruvé le curan daít ala riga blancia. Le resultat vëgn insciö raforzé deperpo che i sogadus aversars devënta nervusc minacian cun parores le arbiter y i aversars. Cun le passé dl tëmp se lascia i sogadus de ciasa tres plö do fora, chësc ti purmët ai ghesc de fa presciun, le portier Julian mëss plö gonot salté fora a antizipé le palé. Al 70^ na scassada por i ladins, l’atacant dl Perca se fej trú cuntra porta y vëgn contrasté te area dal defensur, tl dübe conzed l’arbiter l’önescmetri, che vëgn trasformé da Guggenberger. Do le gol se descëda indo la formaziun y pro de ataché le mezciamp aversar, Stefan vëgn sorví amesa area da Max N., al pro de fa pié ia la trata mo vëgn archité al ultim mumënt dal pé dl defensur. Püch dô röia le medemo ciamó n iade a rebat de ce sön na crossada de Marco S., la direziun ne stimenëia nia y insciö röia le palé dlungia ia. Dan la fin concuistëia Alex le palé a mezciamp y ti sciampa al defensur, sú dan porta veghel la trata de ciamp che ne ó nianca ruvé te porta. Cun le sciür dl’arbiter se röia püch do la partida. N grüm de ocajiuns ne é nia stades anuzades sciöche al toca, mo la scuadra ester sigüda d’avëi mostré na miú prestaziun co atres partides. La Val se destaca insciö dal Perca por sis punc y resta al secundo post adüm al Dietenheim. 

La Val – Perca  3-1

Formaziun La Val: 1. Julian Moling, 2. Luca Pescollderung (dal 80^ Martin Ploner), 3. Marco Castlunger, 4. Paolo Vallazza, 5. Werner Sottara, 6. Freddy Sottara (dal 88^ Christian Dapoz), 7. Marco Sottara, 8. Stefan Sottara - capitan, 9. Adrian Miribung (dal 55^ Franz Tolpeit), 10. Max Nagler (dal 80^ Michele Campei), 11. Alex Elzenbaumer (dal 75^ Alexander Miribung)

Goi por La Val: Marco Sottara al 10^, Alex E. al 40^ y Paolo Vallazza al 50^

 

Proscima partida: Induman sabeda, dales 18:00 a Sest cuntra la scuadra de ciasa