La Val y le Raas se partësc i punc al’ultima de campionat. I ladins se arjüma ia de bones ocajiuns por jì en vantaje, cis tla secunda pert dla partida.

 

 

 

En domënia é ruvá i aversars da Raas a La Val por l’ultima de campionat. La Val pro ciamó de stlü jö bun le rode d’aisciüda, ala fin saltel fora en punt porom, cun les scuadres che süga ala pêr tl pröm tëmp. Tla secunda fraziun é spo i padruns de ciasa che se arjüma ia de gran ocajiuns por fa le secundo gol.

La partida mët man sot na gran plöia y bel dô püc menüc é l’atacant dl Raas che se fej lerch al limit y pro na trata sön le pé lunch de porta che röia por fortüna dlungia ia. La Val che se sënta sot a presciun se sblochëia tosc cun Michele che fej só le palé y crossëia amez, le defensur dl Raas é asvelt y deviada por püch te ciantun. A gauja dl terëgn môl y pesoch é ince le jüch limité, les aziuns vëgn impostades bun, mo i sogadus stënta da controlé le palé che sprinza da vigne pert. Al 30^ menüt de jüch pëia ia Michele te area aversara y vëgn contrasté da dui defensurs, le fal é evidënt y l’arbiter mostra sön le punt di önescmetri. Al é le capitan Marco Castlunger che se presentëia ala trata y la trasformëia tl 1 a 0. Le vantaje por La Val düra püch che le Raas pordüj bel a avalié le resultat. Por en fal defensif vëgn conzedü na puniziun a püc metri dal limit. La trata basa é sëcia sön le pé lunch de porta, le palé rimbalzeia sön le terëgn môl y sprinza dlungia le pé de porta ite, le portier Julian ne röia nia a tignì sö le curan.

Dan le pröm tëmp ne gareta plö degüna ocajiun y insciö pó i sogadus jí te cabina a se stricuré sön le pêr dl 1 a 1.

Al 55^ é spo Michele che á sön le pé l’ocajiun por radoplé le resultat: Marco Sottara fej en bun laur sön na pert y passa amez por l’atacant che röia cun sbunf cuntra porta, a trëi metri dan le verdaporta ne abina chësc nia bun le palé y le fej rové da na pert fora.

Le jüch mët man da se fa grô, plö iadi mëss le arbiter archité le jüch por contrasc y tra fora ince val amoniziun. Al 70^ é Adrian apëna ruvé te ciamp che vega na bela trata sön la passaja dal mezciamp a giré sön le pé lunch de porta, al ne tôl nia jö bun les mosöres y fej ruvé le curan de n pulan dlungia le pé de porta ia. I aversars da Raas röia ma plö sö dainré dan porta ladina y gran ocajiuns da gol ne pon nia alzé fora. Ti ultims menüc de jüch prô ciamó La Val de se porté in vantaje. Le palé concuisté amez ciamp fej pié ia na gran ripartënza da pert d La Val, le palé röia a Christian D. che ti sciampa al defensur da na pert y mët amez n gran preparatif: le pröm a ruvé sön le palé é Freddy che ess ma plö bria de apogé le curan te rëi, chësc ne suzed indere nia, la trata bassa vëgn rebatüda dal pé de porta. Al ne passa tröp tëmp che l’arbiter fej ruvé la partida, en resultat dala saû antia che ess podü ester miú sce les ocajiuns foss gnüdes anuzades sciöche al toca.

Le campionat é ince por La Val ruvé a piz. I resultac debli dles ultimes partides ne ti á nia plö pormetü ai ladins de sté al vare cun les atres concorëntes y é insciö toma zeruch de tlassamënt. Insciö se archita la scuadra al 5˚ y va tla palsa da d’isté por scomencé la nöia sajun de terza categoria da d’altonn.

La Val – Raas : 1-1

Formaziun La Val: 1. Julian Moling, 2. Paolo Vallazza (dal 75^ Werner Sottara), 3. Luca Pescollderung, 4. Martin Ploner, 5. Marco Castlunger - capitan, 6. Freddy Sottara, 7. Christian Dapoz, 8. Max Nagler, 9. Alexander Miribung (dal 55^ Adrian Miribung) 10. Michele Campei (dal 65^ Alex Elzenbaumer), 11. Marco Sottara (dal 60^ Felix Nagler)

Gol por La Val: Marco Castlunger al 30^

Atri resultac:

Altherren: Dietenheim - La Val 2-1
U-10: Taufers I – La Val    3-1