Te na partida combatüda ti gareta ala formaziun ladina de rosedé le svantaje te püc menüc y se condüj a ciasa trei punc de gran valüta.

La Val á incunté te süa setima partida de campionat l’aversar da Uttenheim, nöia scuadra de chësta sajun tl rode C. Sön le ciamp lerch da Uttenheim ti él gnü pité al publich ladin rové adalerch na bela partida, rica de ocajiuns y combatüda cina l’ultim menüt. Le nü aversar pëia ia cun en gran druch, ti prüms menüc é i padruns de ciasa che fej le jüch y se alza a mët sot presciun la defenjiun ladina. Al 16^ vëgn le palé arlungé de puniziun te area ladina, daulache Stefan ne é nia fortuné y rebat cun le brac sënza urëi le curan te süa porta. Püch dô é la reaziun dla scuadra ejemplara, atira costruësc la formaziun ladina trëi gran ocajiuns. Alexander se fej lerch al limit y vega na trata che vëgn tignida sö dal verdaporta. Al 20^ aspeta le capitan Stefan te area daulache na crossada vëgn rebatüda naota de cé y sënza sighité le medemo pro na curëta de forfesc che ti gareta ince y fej ruvé le palé a bót sigü sura le portier ite. Cun le gol é le resultat y le autogol da denant indo avalié. Al ne passa nia daldöt dui menüc che Michele vëgn sorví dal mezciamp, ala trata vëgn le palé rebatü y röia sön le pé de Max che tira te n secundo momënt te porta por le vantaje. Al 30^ é Werner che fej pié ia n’aziun de cuntrapé, al crossëia amez por Alexander che pro de rebat de ce cuntra porta, le portier se destirá y deloj le palé te ciantun. Al 35^ manacia Franz de arlungé le vantaje, sön na gran trata de puniziun indirizada tl set de porta é le un da Uttenheim che desfantëia al’ultim mumënt. Dan la fin dl pröm tëmp é ciamó Alexander che ti fej le pulan al pé lunch de porta cun na trata a giré.

Le pröm tëmp se stlüj jö sön le resultat de 2 a 1 por La Val

Le Uttenheim prô de renforzé l’atach tl secundo tëmp, chësc porta bun ala scuadra, che mët sot a presciun le mür da La Val. Al crësc ince le nervosism te ciamp y le jüch se fej tosc grô. Al 70^ vëgn Luca desgort dal ciamp por dopla amoniziun. Le Uttenheim manacia ciamóde avalié le resultat al 75^ cun na gran trata dal limit che rebat tla stangia. Deperpo che i padruns de ciasa atachëia le mezciamp ladin, stënta i ghesc a tigní sö le palé por ti pormët de trá le flé ala defenjiun. Da alzé fora dessigü la gran prestaziun dl portier Sepl, che á salvé plö iadi le resultat. La partida se röia defata y La Val pó se porté a ciasa trëi punc asuiá mo de gran valüta por l’andamënt dla tlassifica.

Uttenheim – La Val  1-2

Formaziun La Val: 1. Josef Kantioler, 2. Luca Pescollderung, 3. Werner Sottara, 4. Christian Dapoz, 5. Marco Castlunger, 6. Freddy Sottara, 7. Max Nagler (dal 75^ Paolo Vallazza), 8. Michele Campei (dal 65^ Samuel Winkler), 9. Alexander Miribung (dal 80^ Marco Sottara), 10. Stefan Sottara - capitan, 11. Franz Tolpeit (dal 85^ Adrian Miribung)

Goi por La Val: Stefan Sottara al 20^, Max Nagler al 25^

 

Proscima partida: In dumënia ai 23 de otober dales 15:30 a La Val cuntra le San Iöre Junior

 

Atri resultac:

Altherren (La Val): Welsberg – La Val: 1-1

Allievi (La Val):

Giovanissimi (La Val): La Val  – Val Badia: 1-3

U11 (La Val / San Martin): Mareo - La Val / San Martin: 2-0

U10 (San Martin / La Val): S. Martin/La Val – Chienes: 4-1

U8 (La Val): La Val - Dietenheim: 3-0
La Val - Stegen: 3-0