Ince la sajun da d’altonn por la nöia scuadra dl U8 da La Val é ruvada a piz. Na sajun rica de bugn resultac.

Tres deplö él gnü damané a la Val de mët adüm na scuadra por pici sogadus che ne pó nia ciamó sughé para pro la scuadra dl U10 y cun la nöia sajun dl palé a La Val él sté meso de mët impé na scuadra de mituns dl‘ U8 daulache al fej pert sogadus di agn 2008 y plö jogn, che á tut pert al campionat VSS dl raiun de Puster.

Cun i 17 de setember é scomencé la sajun por la nöia scuadra di mituns. Le campionat é struturé atramënter co le campionat U10, vigni fin dl’edema vëgnel organisé sön en ater ciamp n torneo anter deplö scuadres che se mosöra üna cun l’atra te döes o ince trëi partides. Fora por düt le campionat á la scuadra da La Val fat bela figöra portan a ciasa n grüm de devëntes cun de bí resultac.

Ince sön le ciamp a La Val, plö avisa ai 15 de otober, él gnü tigní les partides anter les scuadres dl Stegen, Dietenheim, Alta Badia y La Val, ince chiló á i padruns de ciasa mostré so savëi (La Val – Dietenheim 3-0; La Val – Stegen 0-0).

Le campionat dl’U8 s’á spo stlüt jö ai 22 de otober a Reischach cun le torneo de contlujiun. Les partides jará spo inant cun le campionat de retüda da d’aisciüda. Dlungia i alenamënc y l’insegnamënt de fa rode le palé ti vëgnel ince insigné ai sogadus bel da pici insö de gran valurs, sciöche le crësce adüm, davagné düc adüm y perde düc adüm.

En gran giulan ti va ala Monica Moling da La Val che á alené cun lezitënza la scuadra fora por düt l' altonn. En giulan ti va ince ai geniturs y a düc i acompagnadus che porta i mituns ales partides o da só contribut ala scuadra. Giulan y ma inant insciö!

I resultac dl campionat U8 por La Val: resultac