9ª y ultima partida de campionat - Gsies

Stampa

scuadra_20161

Dan jì tla palsa da d‘invern mëss La Val dlotí la prüma pordüda dla sajun da d’altonn.







Le rode de 3a categoria da d’altonn se stlüj jö in chësc  ann plö adora co i agn da denant, a gauja de en numer mëinder de scuadres scrites ite al campionat. Por La Val él ciamó sön le program la trasferta a Gsies, daulache tl cajo de devënta podess la scuadra se confermé a cé dla tlassifica adüm al Gais.  A ti mët le bastun amesa les giames é avisa le Gsies cun en pic aiüt dl'arbiter jonn Mölgg, cun chël che i ladins á bel albü da sciampí te val atra partida. Al 10^ é le atacant Samuel che á sön le pé na gran ocajiun, le un dl Gsies ciara de tra demez le palé da süa porta mo atoca mal la cogura che ti röia a Samuel, le control ne é indere nia un di mius y le palé ti sciampa danfora. Püch do é la trata dal ciantun che vëgn rebatüda dala defenjiun aversara, al é Stefan che se presentëeia al limit y  prô na trata al jore de püch sura porta fora. Tosc é i padruns de ciasa che tol coraje y fej só le jüch, deplö trates dal limit vëgn apiades cun savëi dal portier Sepl. Ala puniziun al 40^ é Werner che preparëia le palé por la trata de Stefan che é indere massa debla y roda dlungia porta ia.

Le pröm tëmp se stlüj jö sön le resultat de 0-0

Al  50^ vëgn Samuel sorví da na pert jö y chir cun na trata sëcia le pé de porta lunch, le portier é asvelt y archita sö. Cun le tëmp de jüch che vëgn tres mëinder é ince le nervosism te ciamp che se fej sintí. Chësc vegn ciamó metü a düra proa dales dezijiuns arbitrales, le mandl fosch Mölgg tôl plö gunot fora le tacuin y partësc fora gheles por fai da nia y por protestes sënza motivaziuns. Al 60^ vëgn le defnsur Werner desgort dal ciamp por dopla amoniziun, na scëmpla protesta ne vvgn nia tolerada dal diretur. Cun diesc  sogadus te ciamp é le Gsies che tol la situaziun a só vantajé por segné le gol. Sön na trata de ciantun vëgn le palé rebatü dlungia le pröm pé de porta ite. Al 85^ vëgn Michele sorví cun na passaja filtranta y röia sú dan porta, la trata zentrala é por le portier saurida da paré. Cun i scrai dl publich y le marcé te ciamp  perd le arbiter daldöt le control dla direziun y pó ma plö sciuré la fin dla partida. Cun chësta ultima pordüda se posizionëia La Val al secundo post de tlassifica do na buna sajun. Dan jí tla palsa él ciamó sön le program les partides de Copa Provinzia cuntra le Dietenheim.

Gsies – La Val  1-0

Formaziun La Val: 1. Josef Kantioler (dal 75^ Julian Moling), 2. Luca Pescollderung (dal 75^ Martin Ploner), 3. Werner Sottara, 4. Marco Castlunger, 5. Paolo Vallazza, 6. Freddy Sottara, 7. Franz Tolpeit (dal 65^ Max Nagler), 8. Christian Dapoz, 9. Alexander Miribung (dal 65^ Michele Campei), 10. Stefan Sottara - capitan, 11. Samuel Winkler

 

Proscima partida: Copa Provinzia : In sabeda ai 05 de novëmber dales 14:30 a Dietenheim

Atri resultac:


Juniores (Val Badia): Val Badia – Kiens: 3-1

Allievi (La Val): La Val – Vahrn: 0-4

Giovanissimi (La Val): La Val – Team 4: 1-2

U11 (La Val/San Martin): Kronteam vërd - La Val/San Martin: 5-0