Inauguraziun pulmin nü

Stampa

DSC_13795

L’ultim fin dl’edma à l’uniun dl sport da La Val podü inaudé n pulmin nü. N meso d’öga por organisé miú le trasport por i mituns dles scuadres y dla lüsa fora por düt l’ann.







En sabeda ai 12 de novëmber él sté por l’Uniun Sport Amatoriala da La Val na ocajiun por fa festa. Damisdé à l’uniun podü inaudé y benedì en pulmin nü. Le presidënt dl’U.S. La Val Alex Alton à saludé düc i presënc y à spo cunté in cört sciöche ara é gnüda a s’l dé da cumpré en auto nü y süa importanza por l’ativité dl’uniun che crësc tres deplö.

Le pulmin da denant, cumpré tl’ann 2008, gnô anuzé por mené incërch 3 scuadres dl palé di mituns y i atlec dla lüsa tratan l’invern. Cina aldedaincö é l’ativité chersciüda cotan cun le numer dles scuadres dl palé ruvé a 6, la sajun dla lüsa tres plö lungia y l’organisaziun de cursc sciöche le curs de schi y le curs da nodé, che damana le trasport di mituns fora dl paisc. Por mioré l’organisaziun dl trasport à le comité tut la dezijiun de cumpré en ater pulmin. Le vedl pulmin, ciamó te bunes condiziuns, gnará ince ciamó adoré.

Chësc é bele le 5. pulmin che vëgn cumpré dal’U.S. La Val, al se trata de n Opel Vivaro X82 da nü posc, cumpré dala Garage Crepaz a Bornech. Le cost döt adöm daimprò ai 26.000,00 €. En gran sostëgn por le finanziamënt é gnü dai sponsors, cun le sponsor prinzipal che é stada la Fondaziun Cassa dl Sparagn cun n contribut de bëgn 9.000,00 €. Lapró él ciamó sté 17 sponsors privac, dandadöt dites da La Val ch’à daidé finanzié chësc investimënt. Dlungia le pulmin nü á le comité ince cumpré en nü kit de guant por la scuadra de 3a categoria y Altherren da La Val, chilò él ince ciamó sté 4 sponsors privac che á de só sostëgn cun en contribut.

Le vizeombolt da La Val Felix Dapoz á spo tut la parora. Al à rengrazié l’uniun por le laur che vëgn fat y al á sotrissé l’importanza de ofrí ala jënt dl paisc la poscibilité de pratiché n’ativité sportiva. Ince Siur Franz Sottara s’à taché ite ales parores dl ombolt y s’a complimenté cun i funzionars dl’uniun por só laur y sües bries. Al á spo cherdé jö la benedisciun dal cil sön le auto nü y sön i ciafers che jarà impara. Por daidé finanzié le pulmin y le guant nü éle ince gnü organisé na lotaria cun l’estraziun tignida sön la sera. I numeri trac fora pon ciafé sot a chesc linch:  premi lotaria


Inultima à le president rengrazié düc i sponsors por süa desponibilité; zënza de ëi ne fossel dessigü nia sté meso da abiné adöm le finanziamënt, GIULAN!




Sparkasse Sporthilfe
M2_SRL Decor_Srl Seve Grauss Complojer Ploner_Snc
colorit Eros Frenes_Patrick Logo-Alcialc Logo_Termoladinia LOGO__WWW_grande
Mamp_Srl Ranch_Htte Miribung_Sas Plana_Ladina_Srl Tolpeit




DSC_13795 Squadra1l

foto: Simon Ploner