1ª partida de campionat rit.- Tasten

Stampa

foto_scuadra

Buna prestaziun di ladins ala prüma d’aiscüda, che mëss indere ti lascé porté demez en punt ai aversars.






Sön le ciamp vërd da La Val, delibré dala nëi y arjigné ca al miú, él scomencé le campionat de retüda de secunda categoria. Le prüm aversar sön le calënder é le Tasten, che pó sun jì derevers a ciasa cun un en punt te gaiofa, bel avisa sciöche la partida de scomenciamënt dl’altonn, daulache le resultat è ince tomé fora ala pêr. Valgünes dijatenziuns dezisives é la gauja di goi dl Tasten, a chësta maniera é en punt sté rî da dlotí y massa püch por i ladins.

Atira é la formaziun da La Val che mët sot a presciun i ghesc. Bele ti prüms menüc pëia ia na trata dal ciantun por Stefan che se presentëia sú dan porta, le stach de ce é massa zentral y le portier á ma plö bria da devié le palé sura fora. Al 5^ archita l’arbiter le jüch. A gauja de n duel tl’aria apogëia le defensur dërt Luca Pescollderung mal le pé a tera y alda n grac al scenëdl. Le medemo vëgn atira daidé dai cumpagns che spordüs le porta fora te ciamp. Do n valgün menüc fej l’arbiter indo pié ia le jüch, al 12^ se fej Alex E. lerch da na pert y crossëia amez por Max, chësc deviëia le palé cun le ce te porta por le 1 a 0. Do le gol se descëda le Tasten y fej gran druch cuntra la porta ladina, sön les situaziuns da chít esi dassënn stersc y avisa cun chësc vantaje ti gareta la parité. Püch dan le pröm tëmp pëia ia na trata dal ciantun, i ladins nia posizionà a dërt post fej ruvé le palé al’atacant Schwingshackl che á ma plö bria de apogé te porta.


Le prüm tëmp se stlüj jö sön le resultat de 1 a 1 .


Tratan i prüms vint menüc tla secunda pert é indo i ladins al comane. Le bel jüch i fej ruvé tres plö daimpró ala porta. Al 58^ röia na bela passaja de Alex a dërt mumënt sön le pé de Franz al limit che pro la trata al jore: la trata a bót sigü dlungia le pé de porta ite ne ti lascia degüna poscibilité al portier. Nianca le tëmp de festejé le vantaje che le Tasten ti la fej paié ai padruns de ciasa. La rimessa lungia röia tl cajin amez area y cun na deviaziun cogora le curan bel plan dait dala linea de porta. La Val pro ciamó a jí in vantaje do la parité conzedüda tan saurì. Al 78^ vëgn Christian Terza sorvì cun en palé arlungé te area, chësc pro le palonët al portier mo le palé rebat cuntra la stangia alta de porta. Nia da nen fa por le terzo gol. Insciö se röia la prüma partida de chësta sajun de retüda cun na buna prestaziun dla scuadra, le resultat indere é por i sogadus en pü ante da dlotì.

Le prüm pinsier en iade ruvada la partida por i sogadus é savëi sciöche ara ti va a Luca. Cun gran desplajëi mëss i cumpagns aldí che la crujara dl scenedl é rota. A chësta maniera ti augurun a nosc defensur de se remët le plö atira poscibl por l’udëi indo te ciamp!


La Val - Tasten/Welsberg : 2 - 2

Formaziun La Val: 1. Sepl Kantioler, 2. Luca Pescollderung (dal 5^ Egon Frenes) , 3. Werner Sottara 4. Paolo Vallazza, 5. Christian Dapoz, 6. Michele Campei (dal 65^ Samuel Winkler), 7. Max Nagler (dal 70^ Christian Terza), 8. Franz Tolpeit, 9. Alexander Miribung (dal 85^ Felix Nagler), 10. Stefan Sottara - capitan, 11. Alex Elzenbaumer


Goi por La Val: Max Nagler al 12^ y Franz Tolpeit al 58^


Proscima partida: La Val süga en sabeda ai 24 de merz  dales 15:00 a Reischach cuntra la scuadra de ciasa

Atri resultac:

Juniores Pool (Mareo/La Val/Rina): Plose – Mareo  2-1