In dumënia ai 18.03.2018 él gnü organisé da pêrt dl' Uniun dl Sport Amatoriala da La Val la sesta ediziun dla gara de schi alpinism y lüsa sön Armentara, in record de Alexander Ellecosta y Manuel Moling.

 

 

L’evënt, che foss gnü tigní l’edema denant, à msé gní spusté a chësta dumënia a gauja de burt tëmp.Tratan che i atlec ê sön trù cun i schi da tourn por la gara tradizionala da Spëscia cina sön Armentara, ê i atlec dla lüsa che se mosorâ sön la bela pista sot la ütia „Ranch da André“, arjignada ca dala seziun lüsa cun l aiüt dl giat.

Al start dales 10:00 ite a Spëscia se él prejenté plö o manco 20 partezipanć, da chi plö determinà a fà le miù tëmp, a chi che à orü se lascé plö dlaurela y se gode le bel paesaje. Laprò ince na categoria da jì a pé, por chi che á urü sla tó plö cun calma. Le trù dla gara é plö o manco resté chël di agn denant, cun le start sura Spëscia y le travert sö dala ütia “Ranch da André” sön Armentara, daulache bel dô da 30 menüc é spizurá i atlec plö asvelc. Le miú tëmp dl dé é gnü arjunt da Michael Irsara de Badia, che pó mostré sö le tëmp de 31’42. Laprò él ince gnü premié le tëmp ideal che ti va in chësc ann a Ploner Rinaldo da La Val che cun le tëmp de 46’28.

Grana è ince stada la partezipaziun ala gara dla lüsa tignida nia massa dalunc dla traverd di schi, cun 21 atlec al start. Düc i atlec à podü porvé fora daimprüma la pista, por se studié jö les ôtes strëntes y ciafé confidënza.

Püch dô era spo piada ia, düc i atlec à garejé te trëi manchen. Ala fin cun la soma di tëmps él gnü premié le miú: David Moling fej le tëmp de 1’26.63 y se aiudichëia insciö le pröm post. Pro les ëres él Comploi Valeria che ti l’astíca a dütes cun le tëmp de 1’31.31. Ince pro chësta competiziun él gnü premié le tëmp ideal, che vëgn surandé a Comploi Rosmarie cun le tëmp de 1’53.90.

Bel plan é ince spo les mëses pro ütia che se é implides de jënt, ruvada adalerch da deplö paîsc dla Val Badia. Canche düć é rovà sö y s' à metü jö pro mësa, él gnü tignì la Santa Mëssa da Siur Franz Sottara. Dedô él spo stè vigni atlet che à ciafè val da mangé y da bëre y dales 14:00 ti él gnü surandè da pêrt dl presidënt Alex Alton, Diego Tschaffert, Sara Ellecosta y Othmar Moling i pesć ai atleć por i miûs tëmps. Ala fin dla premiaziun ti él ćiamò gnü surandé na picera recordanza ala familia Ellecosta y ala familia Moling.

Ince sce le tëmp ne è nia ste ala pert uressen ringrazié  düc chi che à daidé organisé l’ evënt y düc chi che é gnüs adalerch por stè adüm y a insciö daidé abelì la festa.

Por odëi la tlassifica dla gara de schi alpinism drüca sön chesc linch: tlassifica

Por odëi la tlassifica dla gara dla lüsa drüca sön chesc linch: tlassifica