1ª partida de campionat - Pretau

Stampa

DSCF19d60

Le La Val á metü man le campionat de terza categoria, lascian a Pretau dui punc dala saú antia. Ai se süga en tëmp porom y mëss insciö se acontenté cun la parité.





Do la retrozesciun dl‘ann denant, s‘á formé a La Val en nü grup, cun deplö jogn dl paîsc ruvá pormez dales scuadres plö jones a renforzé la prüma scuadra. Dal’atr pert valgügn mëmbri à lascé la scuadra por ti jí do a atres pasciuns y interesc. A confermé l‘inciaria de alenadú é ste Luca Massa, che á bel podü se studié l‘ambiënt tratan la sajun de retüda d‘aisciüda. Le grup s‘á preparé cun lezitënza ala sajun d’altonn, ince sce les prömes partides de Copa n‘é nia stades al’ altëza dles aspetatives, á la formaziun pité na bela prestaziun tla pröma de campionat, fora de ciasa cuntra le Pretau. Insciö á metü man por La Val na le nü campionat te chësc rode C de terza categoria.

I ladins pëia ia cun na marcia in plö y le vantaje toma bel al 8^: l‘atach pressëia a dovëi la defenjiun y le jonn Moling Philip interzetëia le palé, vëiga le portier fora dla porta y vega le palonët che ti gareta ince. Le sceter dl jüch é inant tles mans dl La Val, al 25^ röia le palé amesa l‘area dl Prettau, la rebatüda röia sön i piesc de Michele che á ma plö bria de apogé la cogura te porta. La partida gira bun por i ghesc che se möi a dovëi y controlëia bun le palé!

Le ritm indere calëia tl secundo tëmp y le sceter passa ai padruns de ciasa. La puniziun davagnada tl piz bass te area ladina vëgn trasformada cun na grana trata tl set de porta sura le portier ite. Nianca le tëmp da trá le flé che le Prettau röia ala parité cun l‘indema trata de puniziun, chësc iade indere vëgn le palé devié dal‘atacant aversar te porta ladina. Le per mët in dificolté la formaziun de Massa, che sot a presciun pro de abiné le vantaje. Al 70^ ti sciampa Michele ala defenjiun y pro la trata sëcia sön le pé lunch de porta, le curan sfiorëia de püch la stangia. Gran ocajiuns ne éle nia plö da udëi y insciö fej l‘arbiter ruvé i nonanta menüc de jüch. La Val lascia insciö dui punc d‘ôr sön trú che foss sta d’öga por mët man a ciaval le campionat.


Pretau – La Val  2-2


Formaziun La Val: 1. Sepl Kantioler, 2. Thomas Ploner (65^ Luca Bernardi), 3. Luca Pescollderung (80^ Campei Simon), 4. Paolo Vallazza, 5. Egon Frenes, 6. Max Nagler, 7. Ivan Tschaffert - capitan, 8. Christian Dapoz, 9. Michele Campei, 10. Christian Terza (68^ Martin Menazzi), 11. Moling Philip (77^ Ploner Alex)

Alenadù: Luca Massa


Proscima partida: La Val süga  in duman sabeda, dales 16:00 te ciasa cuntra le Neustift

Goi por La Val: 8^ Moling Philip, 25^ Campei Michele