6ª partida de campionat - Uttenheim

Stampa

DSCF19d60

Nianca ai pustri da Uttenheim ne ti pó i ladins y mëss azeté na pordüda che ne miorëia nia süa situaziun.





An pó indo dí che La Val s‘ess mirité val deplö, an pó dí che La Val á valgünes ocajiuns d‘or dan porta mo an mëss azeté l fat che i aversars á albü la dërta determinaziun y sanch frëit da segné, ci che al ti mancia atualmënter ai ladins.

Bel atira vëighen che i padruns de ciasa ne ciafa nia la dërta confidënza cun le ciamp, i aversars röia denant sön le palé y insciö tiri inc fora la prüma ocajiun dla partida: ala cher d‘ora vega l’atacant na trata al jore sön na crossada, le palé ti fej indere le pulan ala stangia de porta.  Püch do al 30^ röia Stefan a rebat de ce sön na trata dal ciantun, la prezijiun ne é nia la miú y le curan röia sura porta fora. Ocajiun nia anuzada y gol ciafé, insciö el suzedü püch do, al 34^ ti sciampa le sogadú da na pert jö y apogëia amez por le cumpagn che röia a dërt mumënt a apogé la cogura te rëi. Insciö se röia inc la prüma pert cun le vantaje aversar.

En secundo tëmp nia cis rich de ocajiuns. Al 65^ pëia it Ivan cuntra area y pro na trata sëcia cuntra le portier, chësc ultim se sënta ia por tera y se tëgn la cogura amesa les giames. Ti ultims menüc mëss i ladins rischié val inplö y lascia lerch al‘atach aversar, che anuzëia le mumënt por ruvé a ocajiun plö o manco prigoroses.  Mo i ladins röia ciamó n iade dan porta, Michele mët n bel palé amez por Max che röia a deloj la cogura cuntra porta mo chësta röia ince de püch sura fora.  Da alzé fora ciamó na desgorda porom por burc contrasc. Do le sciür dla fin se ciara i sogadus cun desfidënza y mëss indo dlutí na pordüda che ne dëida nia mioré la situaziun atuala, che oress dí le ultim post de tlassifica cun dui punc arjunc cina sëgn.

La Val – Uttenheim 0-1

Formaziun La Val: 1. Sepl Kantioler, 2. Simon Campei, 3. Paolo Vallazza, 4. Marco Castlunger, 5. Thomas Ploner (60^ Max Nagler), 6. Christian Dapoz, 7. Christian Terza (70^ Ivan Tschaffert), 8. Martin Menazzi (65^ Alex Ploner), 9. Michele Campei, 10. Stefan Sottara – capitan (75^ Patrick Miribung), 11. Alex Elzenbaumer (83^ Luca Bernardi)

Proscima partida: La Val süga chësta dumënia dales 15:30 a Rina le derby cuntra la scuadra de ciasa

 

Atri resultac:

Altherren (La Val): La Val – Schabs 1-4

Juniores Pool (Val Badia): Reischach – Val Badia: 0-3

Giovanissimi (Val Badia): Pichl Gsies  – Val Badia 1-2

U-13 (La Val): Obopuschtra Jd. – La Val 18-0

U-11 (La Val): San Laurënz – La Val 3-3

U-9 (La Val): Dietenheim – La Val 9-2