La Val porta a ciasa la prüma devënta de chësta sajun, rosedan le svantaje bel tl prüm tëmp.

La sabeda da denant s’á i ladins metü sön le lunch trú por jí a Pretau. En gran vënt ti á fat da cornisc a chësta partida, de gran importanza por por tramres les scuadres, che al momënt mostra sö en punt sú sön la cherta. Ince sce l’aversar arjunj bele atira le vantaje, mostra i ladins carater, rosedan püch do le resultat, portan insciö zrug tla valada na bela devënta.

Sciöche bele antizipé, é i padruns de ciasa che va en vantaje dal 2^ menüt de jüch: na passaja alta vëgn controlada a dovëi dal’atacant dl Pretau che chira le trú da na pert jö cuntra porta. Le defensur ciamp ne temporegëia nia y le contrastëia de püch it dal’area. L’arbiter Cicorella, oramai conesciü sön i ciamps de terza categoria, ne sighita nia, mostran insciö le punt dla mascima punziun. Le sogadú Widmann tira amez y porta le Pretau in vantaje. Do le gol se descëda indere i ladin y comana le jüch cun determinaziun. Al 25^ röia le pêr, Philipp M. se presentëia ala trata de puniziun dal ciantun de area y tira lunch sön le secundo pé de porta, le un mëss de destré mo ne röia nia a desfanté le curan. Püc menüc do á Michele l’ocajiun ala trata de punziun dal’atra pert dl’area. Na trata a bót sigü sön le pé cürt vëgn in chësc iade indere delota te ciantun dal portier aversar. Do avëi avalié le resultat ciafa la formaziun de Patrick ciamó plö coraje y radopiëia al 37^. Sön en bel assist de Martin P. röia le medemo Philipp da pert ite cuntra porta y vega le palonët lunch sura le portier ite che ti gareta ince. Gran sodesfaziun por Philipp, che arjunj insciö süa prüma doplëta cun la maliëta dl La Val.

Tla secunda pert é le vënt sterch che comana le jüch, intrames les perts se stënta a sughé, cun le palé soflé da vigne pert. Impó saltel fora na bela ocajiun. Al 55^ antizipëia Alex P. le palé al defensur y röia bel sú al limit dan le portier, ince vël pro le palonët, che röia indere püch dlungia porta ia. Le Pretau pressëia deplö, ruvan ince a val trata, indere nia prigorosa por le portier Sepl. Tl’ultima cherd’ora sofla dassen cuntra le mezciamp ladin, y vigni palé é da bestia rî da controlé; impó ti tëgn bót la defenjiun ai atacanc de ciasa, portan tosc la partida a piz. Na devënta dessigü miritada, che fej bun a düt le grup!

Pretau – La Val 1-2

Formaziun La Val: 1. Sepl Kantioler, 2. Thomas Ploner, 3. Michele Campei, 4. Ivan Tschaffert, 5. Paolo, 6. Luca Bernardi (dal 45^ Alex Ploner), 7. Alex Elzenbaumer, 8. Stefan Sottara – capitan, 9. Christian Terza (dal 83^ Francesco Bergottini), 10. Moling Philipp, 11. Martin Ploner (dal 72^ Walter Complojer)

Goi por La Val: 25^ y 37^ Philipp Moling

Atri resultac:

Altherren (La Val) – Copa Provinzia andata: La Val - Plose: 2-2

Giovanissimi (Val Badia): Val Badia  – Ahrntal 1-2

U-13 (La Val): La Val – Obopuschtra Jugend: 0-0

U-10 (La Val): La Val – Mareo:  0-3