Uniun dl Sport La Val – ativité ann 2020

Stampa

Arancione_Blu_Uova_di_Pasqua_Post_di_Facebook

Ince por l’Uniun dl Sport é l’ann 2020 sté en ann particolar. L’ativité é gnüda limitada cotan a gauja dl’emergënza sanitara, che s’á metü a confront cun de vigne sort de problematiches y restriziuns. Cun l’aiüt de düc canc era impó jüda da tigní inant i punc prinzipai preodüs dal program bel dal mëteman dl’ann y da ti pité inant de vigni sort de ativites sportives ala jënt dl paîsc, ince sce te na forma limitada.




LÜSA:

Sciöche vigni ann é la seziun dla lüsa che deura l’ann cun sües gares, a livel local, nazional y ince internazional. La tradizionala Copa de Südtirol, competiziun formada da trëi gares, ne é tl’ ann nia ruvada a piz, por gauja dla pandemia é la finala a Longiarü gnüda desdita y spostada al’ann dô. Pro i campionac provinziai a Funes é i atlec plö jogn che á sluminé, mostran sö deplö podesc y davagnan la copa tla tlassifica a scuadres por soma de tëmps. Competiziun de piz dla sajun dla lüsa é dessigü stá i mondiai de lüsa alta a Hopfgarten tl’Austria, daulache al start s’á ince presenté Shamira portan a ciasa en buniscimo 4. post tles finales dla domënia.

I campionac taliagn ia en Lijun a mez furá á spo stlüt jö la sajun dla lüsa. Na gran sensaziun an podü se gode tratan chësc fin dl’edema. L’atlet y alenadú Diego Tschaffert s’á denant tut na palsa dales competiziuns dla lüsa, chësc ince por se dediché daldöt ai atlec plö jogn che vëgn do ca. Mo indere chësc fin dl’edema s’á  Diego punsé indo de tra fora la lüsa de cianô por la purvé. Sciöche sce al ne ess mai smetü de garejé é l’atlet ladin le plö asvelt, mostran sö le miú tëmp la sabeda y le miú tëmp por soma (sabeda + domënia). Só é le titul talian, che ti porta na gran sodesfaziun personala y a düta l’Uniun!

Dlungia les competiziuns tradizionales de lüsa alta él in chësc ann indo gnü tigní les gares joniles “Raiffeisen”. De gran complimënc ti va dandadüc ai dui jogn atlec Moling Matthias y Peccei Lara: giulan ai bugn plazamënc tles singoles gares é garatada respetivamenter la medaia de brom y arjent tla tlassifica generala por soma de punc.

Le jonn atlet de lüsa alta da La Val Lukas Peccei, ann 2004, che á garejé ti ultims agn tles competiziuns sön pista naturala a livel local, fej pert te chësta sajun invernala 2019/20 tla scuadra nazionala di jogn de lüsa sön pista artifiziala. Cun bugn resultac te valgünes gares é Lukas gnü nominé a partezipé ala 3ª ediziun di jüc olimpics a Lausanne tla Svizera dai 09 ai 22 de jená 2020, daulache al á stlüt jö cun le 23ejim post.


PALÉ:

Sciöche bele da en grüm de agn inca oramai toma le pëis prinzipal dl’ativité sön la seziun dl palé. Te chësc ann particolar s’á les scuadres preparé tratan l’invern 2019/20 ala sajun de retüda y püch dan le scomencé dles partides ofiziales é i campionac FIGC y VSS gnüs architá dala pandemia, lascian düc i sogadusc a ciasa sënza poscibilité de podëi soghé al palé. Tratan chisc mëisc de chît s’á l’uniun de da fa por organisé les scuadra por la sajun d’altonn.

Do le mez campionat sughé, á la prüma scuadra stlüt jö amez le tlassamënt. A tó tles mans le grup spo tla nöia sajun da d’altonn é sté l’alenadú Patrick Costabiei da La Plí, acompagné da Albert Castlunger d’Al Plan; chisc á tut ite le post dl’alenadú Luca Massa. I dui alenadús s’á da atira integré it bun tl grup stlujon jö le campionat d’altonn al setim post. A gauja dla pandemia é indo gnü bloché le campionat denant co preodü, a trëi partides dala fin.,Tres plö chirida é la scuadra di omi, alenada in chësc ann dal sogadú y alenadú Romeo Rubatscher.

Sciöche l’ann denant é la colaboraziun anter plö paîsc jü inant, al fin de mët sö na scuadra Pool Juniores. Tl campionat 19/20 é sté le ACD Val Badia che á metü sö la scuadra, metüda adüm da sogadus d’Al Plan, Rina y La Val. Le format dl torné ti da la poscibilité ai jogn de sughé le campionat te süa categoria y cun l’ocajiun de daidé fora la gran scuadra dl paisc. Atra scuadra formada da sogadus da La Val y dl Val Badia é stá i Giovanissimi, tles mans di dui alenadús Davide Moling da Longiarü y Piter Flöss da San Martin. Ince le La Val á indo albü sües scuadres joniles, cun le U-13, le U-11 a  y le U-9.

Cun gran plajëi él sté meso porté inant la colaboraziun cun le F.C. Südtirol por organisé le „Alperia Junior Camp“ y confermé insciö ince l’ediziun por l’isté 2020. Amez messé é indô ruvá adalerch i alenadus cualificá dl F.C. Südtirol che ti pita ai sogadús plö jogn l'oportunité esclusiva da imparé y milioré les conoscënzes dl monn dl palé. Scebëgn che la situaziun y les restriziuns por gauja dl covid-19 ne é nia stades otimales por garantì les condiziuns di camps di agn da denant, á le F.C. Südtirol lauré fora y ciafé na soluziun por garantì la mascima segurëza cun dütes les mesüres de prevenziun. Cun l’altonn é ince indo i campionac che á podü pié ia, indere cun valgünes precauziuns por contegní i asembramënc, te ciamp y tles cabines da se mudé. Ince sce l’uniun á ciaré de respeté rigorosamënter chëstes disposiziuns, é les federaziuns stades sforzades a archité sö les partides amez otober.

 

CURSC y DESVALIES:

Dër aprijá é sta i cursc por mituns organisá tratan l'ann: curs de schi por mituns, curs da nodé, curs da jì cun la lüsa, curs de spinning, program sportif d'isté, scora dl pale, curs de yoga y curs de ginastica funzionala. Düc i cursc é gnüs organisá en colaboraziun cun Simon Dapoz, Davide Moling, Heinrich Conrater y Gabriel Prada.

A gauja dla pandemia é la riuniun generala adüm ales lites dl comité gnüda spostada al proscim ann.

L’uniun á spo metü a jí n’aziun de solidarieté tratan le tëmp dl lockdown, che á albü en gran suzes. La bela soma coiüda adüm ti é gnüda surandada ales seziun dla Crusc Blancia de nosta valada, che á afronté in prüma linea les desfides de chësta situaziun.


PROGRAM 2021:

Ince sön le program por l'ann 2021 éle gnü lauré dassenn. Le comité é bel tl organisé les scuadres por le proscim campionat a gauja dl'interuziun antizipada di campionac de retüda. Tl medemo temp éle gnü lauré fora en cop de cursc desvalies, che gnarà presentá proscimamënter. Chësc punt nes stá particolarmënter a cör: a gauja dla situaziun é les poscibilites de fa movimënt por pici y gragn dër limitades, por chësc él por nos de gran importanza ofrí ala jënt plö poscibilites poscibles.

Sön le program de chësc ann él ince indo l'organisaziun dl Alperia Football Camp cun le FC Südtirol, sciöche ince la nöia colaboraziun cun le proiet Multisport, che va arechësc insciö l'oferta. Novitês ne manciará nia chësc ann!

Sciöche punt de gran pëis é le proiet por la rivalutaziun dla zona sportiva "Plans", che é ruvé a bun punt y nes portarà resultac concrec tratan l'ann.


L’uniun é piada ia cun otimism tl’ann 2021, speran che chësta situaziun se normalisëia y che an pó indo rové adüm por pratiché les ativitês de grup sënza gran restriuziuns!