L'Uniun Sport La Val, en colaboraziun cun le F.C. Südtirol, à organisé ince chësc isté, plö avisa dai 12 ai 16 de messé, la cuarta ediziun dl’ „Alperia Junior camp“.

Scebëgn che la situaziun atuala ne é nia daldöt otimales ciamó por garantí les condiziuns di camps di agn da denant, á le F.C. Südtirol lauré fora y ciafé na soluziun por garantí la mascima segurëza . Chësta soluziun ti á ince plajü al’Uniun dl Sport da La Val, che é jüs adincuntra al proiet, dandadöt por ti pité a düc i mituns la poscibilité de sughé indo al palé, do en lunch tëmp, daulache le sughé al palé adüm ai cumpagns ne ê nia tan saurí. Te chësta cuarta ediziun é i 40 sogadus gnüs partîs sö te deplö grups, cun alenamënc danmisdé y domisdé. I mituns á albü l’ ocajiun da podëi imparé da alenadus spezialisà tl ciamp dl palé, che á alené cotan de scuadres de alt livel. I alenadus á gran capazites y conoscënzes sura l’monn dl palê mo sá ince co motivé y dëidé i mituns emotivamënter.

Le pröm dé, le lünesc, él vigne sogadú che á podü pié dô na tascia cun de vigni sort de guant por i alenamënc. Bele atira án odü che i mituns â n gran interesc a imparé valch de nü. Tartan chisc alenamënc intensifs i él gnü insigné les tecniches fondamentales dl jüch dl palé, sciöche an fej da archité, porté y passé indortöra le palé.

Le camp é gnü stlüt jö le vëndres, olache vigni partezipant á podü pié dô n atestat de partezipaziun. N gran giulan ti va ai organisadûs y acompagnadus che ê presënc por vigni nezescité sön le ciamp.

En gran giulan ti va sambëgn al’comité d’organisaziun dl Alperia Junior Camp, che s’á de da fa por respeté les disposiziuns dades dant.

A düc i partezipanc ti va l’aodanza che ai pois porté inant i früc de chëst’edema te sües scuadres. Por le dagní sperunse de podëi organisé inant de té manifestaziuns che é de gran importanza por nüsc mituns che á interesc da crësc y mioré tl jüch dl palé.