4ª partida de campionat - Pretau

Ince do chësta cuarta partida de campionat resta le La Val sënza goi fac. Les ocajiuns cuntra le Pretau é stades cotantes, mo la fan da gol á indo mancé. Les döes formaziuns, al momënt cun 0 punc te gaiofa, s’á batalié cina la fin, a boc cun en jüch gro y cun nervosism. Cun dejplajëi é ince ruvé adalerch la crusc blancia a dé prüm aiüt an sogadú ladin y aversar.

Bele al 8^ menüt de jüch á l’arbiter archité le jüch: Michele C. á orü archité sö le curan y á pesté jö mal le pé ciamp. I scrai dl sogadú ia por tera ne fej preodëi nia de bun y insciö vëgn inche cherdé la crusc blancia. I cumpagns se stënta insciö da tigní la luzidité por i proscims diesc menüc y vëgn pressá dai aversars cuntra porta. Al 20^ indere do na trata dal ciantun ti röia le palé a Alex E., sú dan le numer un dl Pretau che te chësta partida é avisa le ex alenadú dl La Val Luca Massa, le sogadú ne á nia le tëmp de controlé che Massa ti stopa bel le spidl dla porta. Püch do davagna i padruns de ciasa na puniziun dal limit, la trata zentrala de Alex ti sciampa fora dles mans a Massa, te chësc röia Alex Rubatscher a rebat sëch sura porta fora. Alex “Ruba” süga in chësc ann pro le La Val sön imprest dal Mareo y á podü pié ia sciöche titular te chësta partida. Al 43^ suzed spo le proscim fat nia plajor, sön na repartënza dl Pretau vëgn l’atacant Reichegger contrasté dala defenjiun, toma a tera y apogëia mal la sciabla, che ti cogura fora. Le medemo mëss ince gní porté te ospedal, al pó anuzé la crusc blancia bel presënta sön le post.

I sogadus pó tosc jí tla palsa a cöi adüm nöies forzes por la secunda pert. Te ciamp röia i ladins cun plö druch y ti é ince da sughé fora bun le curan, la dificolté é i ultims vint metri, daulache al mancia la velozité por jí ala contlujiun. Al 60^ se fej lerch Philip al limit y fej pié ia na trata indirizada cuntra l’incrujiada, le portier mëss se destrá y rebat cun Ie pügn le pale cuntra la stangia de porta. Püch do al 68^ pëia ia le defensur Thomas da na pert jö y passa amez por Walter che ne röia nia a trà; le palé röia indere a Alex che pro ciamó la trata a giré, chësc iade indere sura porta fora.

Tl’ultima cherd’ora regnëiel le marcé te ciamp, tramres formaziuns ó porté a ciasa i trëi punc a düc i cosc. I ladins fej ciamó pié ia valgünes trates cuntra porta, mo le portier Massa les tëgn sö cun savëi.

Le prüm pinsier en iade ruvada la partida por i sogadus é savëi sciöche ara ti va a Michele. Cun gran desplajëi mëss i cumpagns aldí che la crujara dl scenedl é rota. A chësta maniera messará la scuadra da La Val fa ademanco de Mic por plö dî, ti augurun de se remët le plö atira poscibl por l’udëi indo te ciamp!

La Val – Pretau   0-0

Formaziun La Val: 1. Sepl Kantioler, 2. Thomas Ploner, 3. Michele Campei (dal 8^ Walter Complojer), 4. Max Nagler, 5. Paolo Vallazza, 6. Christian Terza, 7. Simon Campei, 8. Stefan Sottara – capitan, 9. Philip Moling, 10. Alex Elzenbaumer, 11. Alex Rubatscher

Proscima partida: La Val in duman sabeda dales 15:00 te ciasa cuntra le Neustift