5ª partida de campionat - Neustift

Stampa

La_Val_Rina

Le La Val mostra na bela reaziun cuntra le Neustift y bataliëia cina l’ultim por se fa süa la prüma devënta d’altonn.






Do en scomenciamënt de campionat a pé zot y dô valgügn infortuns ne ê la situaziun dla scuadra da La Val nia la plö saurida. Te chësc ultim fin dl’edema se fajo sintí ciamó lapró valgünes asënzes, avisa cuntra i aversars da Neustift, che á bel l’ann denant desmostré de ester de bugn candidac a fa le salt de categoria. La formaziun limitada de Patrick Costabiei é indere jüda te ciamp cun la dërta determinaziun y á combatü sön vigni palé, desmostran na bela reaziun de scuadra y á insciö fat süa la prüma devënta te chësta sajun. I trëi punc ti á indere ince costé val ala scuadra, indo á msé ruvé adalerch la crusc blancia por mediché dui sogadús ladins.

I jun daimpró ia cun l’andamënt dla partida. Bele dal mëteman é i ladins conzentrá sön vigni situaziun de jüch. Al 15^ ti sciampa Alex E. da na pert jö y passa amez por Stefan che röia adalerch ala trata, al pro de incrujé bass sön le pé lunch, indere de n sofl dlungia ia. Sön les trates dal ciantun é chi da Neustift stersc y ti la fej düra al La Val cun valgünes rebatüdes de ce de püch sura porta fora. Al 32^ spo le vantaje ladin: sön na passaja amez area röia Philip M. sön le curan, le control é bun, al se gira y tira sön le pé lunch. Le portier ne pó fa nia decuntra. Püch do al 40^ dal ca en gran cajin te area ladina, le sogadú ruvé por prüm apogëia le curan te porta, l’arbiter sciüra le forajüch y i aversars se scialda dassënn y protestëia cuntra la dezijiun arbitrala.

Tl secundo tëmp röia les döes formaziuns indo plö calmades te ciamp, almanco por la prüma pert. Sëgn é i aversars co drüca dassënn, ince sce gran ocajiuns ne esi nia bugn de tra fora, feji pié ia cotan de trates cuntra porta. Le portier Nathan se desmostra al’altëza, i palés vëgn tignís sö cun bravura. Nia de prigorus sozed cina le 65^, canche Felix N. pësta jö mal le pé y sënt na dërta ficiada ala ciaidla, chësc mëss lascé cun gran desplajëi le ciamp. Dal’atra al 70^ pert driblëia Martin P. valgügn defensurs y mët le palé amez por Manuel C., che pro de incrujé, mo la trata é debla y röia dlungia ia. Atira do rinviëia le portier lunch sön i atacanc, le defensur zentral Alan Erlacher pro de antizipé, mo tl duel cun l’aversar toml y bát le ce a tera. Atira vëgn Alan da nescia y i compagns salta adalerch spordüs. Por fortüna ne passl nia tröp che al revëgn, confus mo pro se instës. L’arbiter sospënn insciö por valgügn menüc la partida, cina che Alan é bun de se alzé impé, pó gní acompagné fora de ciamp y sorandé al prüm aiüt. Sënza plö reservers mëss ciamó i ladins tigní prësc vint menüc de jüch. Le Neustift ne sciafia indere nia plö de avalié le resultat. I padruns de ciasa, surapinsier por sü compagns, po festejé insciö la prüma devënta te chësta sajun, do avëi batalié cun orenté por plö de nonanta menüc.


La Val – Neustift   1-0


Formaziun La Val: 1. Nathan Massa, 2. Natan Colletta (dal 71^ Denis Erlacher), 3. Thomas Ploner, 4. Alan Erlacher (dal 75^ Manuel Costabiei), 5. Christian Terza, 6. Philip Moling, 7. Felix Nagler (dal 65^ Alex Miribung), 8. Stefan Sottara – capitan, 9. Martin Ploner, 10. Alex Elzenbaumer, 11. Alex Ploner


Gol por La Val: Moling Philip al 32^

Proscima partida: La Val á antizipé la partida cuntra le Dieteheim al vendres dales 20:00 sön le ciamp a La Val