Finala de Südtirol Cup a Lungiarü
La sajun dla lüsa se stlüj jö cun la finala dles trëi gares de Copa de Südtirol, tignida sön la pista „Do Juvel“ a Longiarü.
Lüsa – Chësc ultim fin dl’edma él gnü tignì la terza y ultima gara de Copa de Südtirol. La pista “Do Juvel” a Longiarü, chirida fora por stlü jö la sajun di liöstri, é gnüda arjignada ca te condiziuns otimales por garejé. N gran lâlt y giulan ti va al Uniun dl sport da Longiarü por la buna organisaziun dl evënt. I atlec de lüsa alta á ciamó porvé de cöie adüm val punc por la somatoria finala, i miûs é spo gnüs premià sön le tert dl domisdé. Ala pert sambëgn ince i atlec ladins.
Jun daimpró ia cun i resultac di atlec ladins arjunc pro l’ultima gara a Longiarü, alzan fora sciöche prüm le podest ladin pro la categoria aliefs jonil 2 cun Campei Fabian da La Val al 1. post (1’09.50) y Frenes Max al 3. post (1’12.57). Tla categoria aspiranc él ince salté fora na medaia de brom, chiló röia Alton Elias cun le terzo tëmp de 1’06.56 al travert. Sciöche scuadra jonila por soma de tëmps, röia ciamó i atlec da La Val a pié do la medaia de brom. I dui atlec Magdalena y Nicolas Alton á ince podü ciarcé la pista da competiziun, slisuran jö sciöche prüms a daurí la gara.
Do la premiaziun dla terza y ultima gara él sciöche vigne ann gnü trat la soma di punc concuistá tratan dütes trëi les competiziuns.
Tla somatoria dles singoles categories ne é i bugn resultac di ladins nia mancia, tla categoria di aliefs röia Frenes Max al 3. post cun 140 punc, Campei Fabian al 5. post cun 100 punc. Tla categoria di aspiranc se posizioneia Alton Elias al 4. post cun 176 punc y Moling Matthias al 7. post cun 145 punc.
La Copa de Südtirol se porta a ciasa l’atlet Frei Sebastian da Laugen/Tisens y pro les ëres l’uramai conesciüda Theresa Hilpold da Pfeffersberg, che pó mostré sö le prüm post te dütes les trëi gares.
Cun chësta finala ne se stlüj nia ma jö l’ediziun dla Copa de Südtirol mo ince la sajun dla liösa alta.
La Uniun dl Sport uress se congratulé daimprüma cun düc i atlec dla scuadra che desmostra na gran devoziun al' ativité y che arjunj tres danü de beles sodisfaziuns. N gran giulan ti va dal' atra pêrt ai organisadûs y ai acompagnadûs dla seziun, che cun só gran laúr y sostëgn dà dessigü n gran contribut a tignì alâlt le sport dla lüsa .