1ª partida de campionat - Pretau

Stampa

La_Val_Rina

La Val mët man cun le pé dërt la sajun d‘altonn dl rode c de 3 categoria.






Sön le program atira la lungia trasferta a Pretau. La scuadra dl La Val é ince intan nöia, cun valgügn sogadús jogn gnüs lapró y tra l ater ince val renforz dal paîsc vijin d’ Al Plan. Al comane dla scuadra ladina é indo Patrick Costabiei da La Plí che vëgn acompagné in chësc ann da só cumpagn Albert Castlunger d’Al Plan. Plajëi à ince fat de podëi i dé le bëgn gnü zruch a Michele Campei, tumé fora l‘ultim campionat por en burt infortüne. I nonanta menüc sogá deplëgn ti á de sigurté y ince ël á contribuí a na devënta bataliada y miritada. Te porta ladina ince en nü portier, Giovanni Erlacher da San Martin a fat só debut cun la maliëta dl La Val.

I ghesc pëia ia bun y röia bele ti prüms menüc a manacé de jí in vantaje. Sön na trata dal ciantun röia Felix a rebat de ce, le palé indere ti fej la berba al pe de porta. Ala cherd‘ora röia n bel palé alt amez por Alex M. che stachëia a dovëi y rebat cun le ce te porta. L‘arbiter anulëia indere le gol por posiziun de forajüch. Le gol toma spo al 25^: l’atacant Mattia M. röia a dërt post sön la rebatüda dl portier por apogé le curan te rëi. I ghesc atachëia bun, ci che ne gareta nia tres é l’ultim passaje por ruvé te porta. Cina la palsa di carantecinch menüc ne sciafia le Pretau nia da trá le flé, i ghesc indere mëss se organisé damí por stlüj la partida.

Le radopl dl resultat vëgn spo al 49^ daulache Felix driblëia cun sigurté le defensur y tira sëch cuntra porta, le curan rebatü dal portier röia indo sön i pîsc a “Matti”, che ne sighita nia y apogëia indo te porta por le 2 a 0. Le dopl vantaje destöda por en mumënt le nervosism de messëi mët al sigü le resultat le plö atira poscibl. Al 56^ en burt mumënt, le sogadú Felix pro de driblé danü mo vëgn afronté da bëgn trëi aversars che le smorzia ite sciöche na forfesc. Le sogadú, cun na bóta al ce, mëss gní condüt fora del ciamp. Le La Val davagna ciamó val ocajiuns dan porta mo che ne é nia prigoroses plö co intan. Cun le sciür dl’arbiter se röia la partida y i ladins sun va derevers tla Val Badia cun i trëi punc te gaiofa.

Pretau – La Val   0-2


Formaziun La Val: 1. Giovanni Erlacher, 2. Simon Campei, 3.Paolo Vallazza, 4. Max Nagler, 5. Michele Campei, 6. Philip Moling (dal 62^ Marco Miribung), 7. Felix Nagler (dal 56^ Christian Terza), 8. Stefan Sottara – capitan, 9. Mattia Mutschlechner, 10. Alex Elzenbaumer, 11. Alex Miribung (dal 84^ Complojer Alexander)

Goi por La Val: Mattia Mutschlechner al 25^ y 49^


Proscima partida: In duman sabeda dales 15:30 te ciasa cuntra l Falzes


Atri resultac de chësc fin dl'edema:

Altherren: La Val – Milland  3-1

U-12: La Val – Valdaora  0-3

U-10: La Val – Gais/Uttenheim  2-1